DILI, 01 abríl 2023 (TATOLI)- Ekipa konjunta kompostu hosi Komisaun Funsaun Públiku (CFP, sigla portugés, Komisaun Anti-Korrupsaun (CAC, sigla portugés), Inspesaun Jerál Estadu (IGE), Diresaun Nasionál Transporte Terrestre (DNTT) no Polísia Nasonál Timor-Leste (PNTL), liuhosi Departementu Tránzitu Rodaviáriu, sesta ne’e, halo apreensaun ba Karreta Estadu hamutuk 11 ne’ebé halo movimentu iha loron fin semana.
“Operasaun ba ohin nian, ami konsege rekolla evidénsia karreta Estadu hamutuk 11,” hateten Pontu fokál Komisaun Anti-Korrupsaun ne’ebé reprezenta ekipa konjunta, Euclides Madeira, ekipa Konjuta Euclides Madeira ba jornalista Agência TATOLI,I.P iha Patrimómiu Estadu Balide, sesta ne’e.
Hosi karreta Estadu ne’ebé ekipa konjunta halo apreensaun maioria kondutór sira laiha karta kondusaun no laiha orden servisu inklu balun uza karreta la’ós oras serbisu.
Maibé, nia dehan funsionáriu ida lori karreta Estadu mak iha potensia ba krime, ne’e CAC mak sei haree, inklui sé iha infrasaun ba sansaun administrava Komisaun Funsaun Públiku no Inspesaun Jerál Estadu mak sei haree.
“Ami sei haree depende ba grau infrasaun ne’ebé funsionáriu ka kondutór ne’ebé lori karreta Estadu ne’e komete, tanba ne’e ami sei tuur hamutuk hodi ko’alia sá medida mak ami aplika tuir infrasaun ne’ebé funsionáriu ida lori karreta fora hosi oras servisu”, nia afirma.
Tuir rezolusaun Governu númeru 30/2022 no orientasaun Primeiru -Ministru, Taur Matan Ruak, nia klaru katak karreta Estadu tenke para hotu iha servisu fatin bainhira liu ona oras serbisu. Nune’e ba oin ekipa konjunta sei instensifika liután operasaun ida ne’e la’ós de’it iha loron bo’ot , maibé bele mós loron-loron.
“Ami sei tuur hamutuk hodi dezeña planu operasaun ida atu operasaun labele iha tempu nesesariu de’it, maibé tenke rutina. Signifika operasaun ne’e sei la para iha ne’e sei kontinua”.
Ekipa konjuta mós deteta funsionáriu balun sei kontinua toman lori karreta Estadu ba para iha uma, tula família no uza karreta Estadu ba interese privadu.
“Ami sei la tolera funsionáriu ne’ebé uza karreta Estadu ba ho interese privadu”, nia lamenta.
Iha biban hanesan, Komandante Tránzitu Munisípiu Díli, Inspetór Polísia Domingos Gama fó oa orientasaun ba membru tránzitu munisipiu Díli atu halo pasa revista ka karreta no motór sira ne’ebé viola kódigu Estrada, inklui karreta Estadu sira ne’ebé mak sirkula la tuir oras servisu.
“Kuandu karreta Estau sirkula fora iha oras servisu tenke hareee dokumentu kuandu iha orden servisu autoriza nia halai, kuandu la’e haruka para no halo apreensaun kedan hodi prosesa funsionáriu ne’e”, nia afirma.
Tuir observasaun jornalista Agência TATOLI iha tereñu katak ekipa konjunta halo operasaun ba pontu entrada sira hanesan iha área Fatuhai, Lahane, Tasi-Tolu no Manleuana.
Husi karreta Estadu ne’ebé mak ekipa konjunta halo apreensaun hamutuk 11 barak liu iha área pontu entrada Tasi-Tolu, Lahane inklui iha Díli-laran, tanba laiha orden servisu no uza karreta fora hosi oras servisu.
CAC Prosesa funsionáriu 30
Entretantu, Euclides Madeira, informa iha tinan 2022, CAC prosesa sansaun krimiál ba funsionáriu hamutuk 30, tanba lori karreta Estadu ba halo fali interese seluk.
“Iha tinan 2022, tuir dadus CAC prosesa funsionariu hamutuk 30 tanba lori karreta Estadu ba para iha uma, tula família, tula sasan uza karreta Estadu sein orden servisu no lori karreta Estadu fora oras servisu nian hetan sansaun administrative no disipliñar”, nia afirma.
Ba funsionáriu ne’ebé komete infrasaun ba iha krimi ne’e otomatikamente submete ba CAC mak ezerse kompeténsia hodi haree ba kestaun ne’e.
Husi funsionáriu nain-30 ne’ebé CAC prosesa ne’e, maioria mai hosi Ministériu Edukasaun, Ministériu Agrikultura (MAP) no Ministériu Administrasaun Estatál (MAE).
Notísia relevante:Ekipa Konjunta Halo Apreensaun Ba Karreta Sia Hosi ME
Jornalista: Natalino Costa
Editór : Florencio Miranda Ximenes
