Atividade pilár lima importante ba komunidade musulmanu durante fulan Ramadhan
DILI, 03 abril 2023 (TATOLI)—Vise Prezidente Konsellu Nasional Izlámiku Timor-Leste (KONISTIL), Abdullah Inácio António Soares, hateten durante fulan Ramadhan iha atividade pilár lima ne’ebé importante ba komunidade musulmanu hodi hala’o.
“Durante fulan Ramadhan hanesan parte ida hosi pilár lima importante iha Izlámika. Ne’ebé komunidade musulmanu atu hala’o mak hanesan syahadat, orasaun, jejum, karidade, no haji ,” Abdullah Inácio António Soares dehan ba Tatoli liuhosi Entrevista Eskluziva, segunda ne’e.
Nia dehan, fulan Ramadhan ne’e rasik hala’o bazeia ba kalendáriu izlamiku ninian ne’ebé sira-nia profeta Muhammad Shallallahu Alaihi Wasallam ne’ebé hetan revelasaun ka wayu nomós livru sagradu al-quran. Ho istória ida ne’e, ba musulmanu atu selebra nafatin ho fulan Ramadhan ne’e.
“Atu kompleta ami-nia prátika iha jejum ami presiza kompleta mós hosi parte karidade ka zakat fitrah. Tuir izlam nia dutrina iha fulan Ramadhan ne’e, mós ami estuda kona-ba ekonomia sosiál ne’ebé ami presiza haree hosi parte sosiál nomós parte ekonómia ninian, mak komunidade ne’ebé iha kbiit nia iha responsabilidade moral tomak fó tulun ba maluk sira ne’ebé laiha kbiit,” nia hateten.
Nia dehan, antes atu tama fulan Ramadhan buat na’ebé komunidade musulmanu prepara mak, dahuluk ida-idak tenke hahú prepara an liuhosi intensaun ba Maromak liuhosi Jejum no fiar ba profeta Muhammad Shallallahu Alaihi Wa sallam.
“Iha parte prátika jejum ne’e la’os de’it ami atu lulik ba han hemu maibé parte buat barak ne’ebé ami labele halo hanesan fuma tabaku, no seluk tan,” nia hateten.
Tuir komunidade musulmanu nian iha tempu Ramadhan ne’e ema ne’ebé tuir jejum ne’e, hahú hosi tinan neen ba leten iha obrigatóriu atu tuir, maibé ba feto sira ne’ebé moras fulan nian mai ka menstruasaun, ema moras sira, katuas ferik no inklui ema ne’ebé halo viajen dook mak labele halo jejum.
Durante fulan Ramadhan komunidade musulmanu halo jejum tuir kalendáriu durante loron 30 no bele mós loron 28.
“Durante fulan Ramadhan ne’e, loron ida ami reza ka hasa’e orasaun dala-lima hahú hosi hosi dader solat subuh, meudia sholat dzuhur, loraik sholat ashar, no kalan, iha oras tuku hitu sholat maghrib, no kalan boot liu mak bolu sholat isya,” esplika.
Objetivu hosi jejun ne’e mak atu hasa’e orasaun ba Maromak husu perdaun, no iha tempu ne’e sira atu estuda hodi motiva sira ba moris nian liuliu iha parte vida esprirituál nian no sira mós halo atividade hanesan asaun karidade ba ema seluk.
“Asaun karidade ne’ebé ita halo mak haree liuba ema sira ne’ebé presiza tulun, liuliu orfonatu sira. Asaun karidade ne’ebé ita halo mak hanesan fó ai-han, osan, no ropa,” nia hateten.
Sentru orfonatu ne’ebé daudaun Konsellu Nasional Izlámiku Timor-Leste harii iha munisípiu tolu, hanesan Baucau, Dili no Viqueque, no ba oin tenta sei harii tan orfonatu iha munisípiu Lautém-Lospalos no Liquiça.
“Ami mós estabelese ona ramu KONISTIL iha munisípiu hitu, hanesan, Baucau, Lautém, Viqueque, Liquiça, Bobonaro no Manufahi. Ida ne’e ita estabelese ona signifika ita sei kompleta tan hosi parte orfonatu sira,” nia dehan.
Jornalista : Arminda Fonseca
Editora : Armandina Moniz
