Top

Governu sei implementa pensaun sosiál hosi $50 ba $57 iha juñu

Prezidente INSS, Longuinhos Armando Leite. Imajen TATOLI/Egas Cristóvão

DILI, 03 abríl 2023 (TATOLI)—Prezidente Administrasaun Institutu Nasionál Seguransa Sosiál (INSS), Longuinhos Armindo Leite, hateten Governu liuhosi INSS sei implementa pensaun sosiál hosi $50 ba $57 iha faze dahuluk tinan ne’e nian iha fulan-juñu.

“Ita halo pagamentu ba ita-nia ferik-katuas no ema ho defisiénsia halo mudansa ba dala rua, mak dahuluk ita selu $30, depois sa’e ba $50 no agora sa’e tan ba $57. Nune’e iha sei selu hahú iha juñu tinan ne’e,” Longuinhos Armindo Leite hateten ba Agência Tatoli iha nia kna’ar fatin Caicoli, segunda ne’e.

Prezidente INSS hateten, Governu aumenta osan ba $57 tanba ema haree ba ema-nia mediu moris iha mundu ne’e, ema ida loron ida presiza aihan ho osan $1.90.

“Entaun ho ida-ne’e, ita bele dehan ema ida han $57 iha fulan ida nia-laran. Nune’e Governu aumenta osan ne’e hodi bele asegura estandar moris nian,” nia dehan.

Governu aloka osan hamutuk millaun $57 ho pensaun sosiál ne’ebé rejistu iha INSS hamutuk 100.832.

Governu aprova no dekreta ona dekretu-lei númeru 53/2022, ne’ebé Prezidente Repúblika promulga ona iha loron 20 fulan-jullu, tinan 2022, katak subsídiu pensaun sosiál sei sa’e hosi $50 ba $57.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!