DILI, 03 abríl 2023 (TATOLI) – Ministru Obra Públika, Abel Pires, orienta tékniku sira husi Diresaun-Jerál Estrada, Ponte, Prevensaun, Kontrolu no Cheias (DGEPPCC, sigla portugés) no empreza Montana Di’ak normaliza estrada ligasaun entre Gleno no Ermera Vila hodi fasilita movimentu komunidade nian.
Orientasaun ne’e halo hafoin ministru observa direta, kondisaun estrada iha área suku Humboe ne’ebé liga postu administrativu Gleno no Ermera Vila, ne’ebé kotu totál tanba afeta hosi udan-boot iha iha semana kotuk. Aleinde ne’e, governante mós haree direta ponte Faturegas iha fatin hanesan.
“Ne’e ita tenke atende lalais, loke dalan alternativu atu nune’e bele fasilita komunidade”, Ministru Abel Pires hatete iha nota ne’ebé Agência Tatoli asesu.
Bazeia ba orientasaun serbisu Ministru Obra Públika nian maka empreza Montana Di’ak mobiliza kedas ekipamentu pezadu hodi loke dalan alternativu ba asesu komunidade nian, inklui ponte provizóriu hodi fasilita movimentasaun.
Ministru Abel husu ba empreza ne’ebé halo atendimentu emerjénsia entre Gleno bá Ermera Vila no Gleno bá Letefoho atu kontinua halo serbisu, nune’e bele fasilita movimentasaun transporte no ema nian, tanba área hirak ne’e ho kondisaun estrada grave tebes no ponte ne’ebé kotu difikulta komunidade, tanba daudauk ne’e transporte públiku no privadu labele ultrapasa, inklui asesu bá merkadu no sentru saúde.
“Aleinde kondisaun ponte sira ne’ebé grave, iha mós estrada iha diresaun refere ne’ebé rai-monu taka estrada, maibé daudauk ne’e normaliza ona no bele fasilita ona movimentasaun komunidade nian”, dehan.
Iha observasaun ne’ebé ministru halo, iha segunda ne’e, hetan akompañamentu hosi autoridade sira munisípiu Ermera nian.
Jornalista: Antónia Gusmão
Editora: Maria Auxiliadora
