DILI, 03 abríl 2023 (TATOLI)—Deputada hosi Bankada PLP no Atuál Vise Prezidente Parlamentu Nasionál, Maria Angelina Sarmento, husu Ministériu Edukasaun Juventude no Desportu (MEJD) presiza fó apoiu urjente ba estudante hosi Eskola Téknika Agrikultura Natarbora ne’ebé afeta hosi insendíu foin lalais.
“Hakarak hato’o iha plenária ida ohin, informasaun ne’ebé ha’u haree rasik ho matan iha sábadu semana kotuk bainhira halo atividade kontaktu eleitorál iha postu administrativu Barique-Natarbora, iha semana rua liu ba por volta iha loron 17 ka 18 marsu, akontese inséndiu boot iha eskola SPP-Natarbora kauza hosi sirkuitu ahi nian. To’o agora seidauk apoiu ka intervensaun hosi Ministéiru Edukasaun Juventude no Desportu (MEJD) liu-liu halo vizita ba estudante sira hodi haree sira-nia kondisaun, nune’e urjentemente presiza apoiu,” Deputada ne’e levanta liuhosi reuniaun plenária PN, segunda ne’e.
Inséndiu ida-ne’e rezultadu eskola ne’e ho estudante hamutuk na’in-29 mak sai vítima, tanba sira-nia dormitóriu ahi han totál no sasán hanesan dokumentu diploma, billete identidade, kartaun eleitorál no mós osan ne’ebé inan-aman haruka ba estudante sira-ne’e hodi selu eskola.
Sasán sira seluk, nia dehan, mak hanesan roupa, kama, kulxaun hodi toba, sapatu, livru inklui materiál ba prátika nian hanesan xave, katana ho sira seluk ahi han hotu kedas.
“Ho ida-ne’e mak kondisaun alunu sira-nian, ita bele dehan triste tebes. To’o agora seida’uk halo fila-fali manutensaun ba eletrisidade hosi EDTL ne’ebé mak sirkuitu hodi estraga fatin dormitóriu ne’e ahi han mutuk tiha. To’o agora ahi seidauk lakan, estudante sira kala-kalan estuda iha nakukun laran no sira mai hosi munisípiu oioin,” nia dehan.
Deputada hosi bankada Governu ne’e hateten, to’o agora seidauk iha apoiu ka intervensaun hosi MEJD liu-liu halo vizita ba estudante sira hodi haree sira-nia kondisaun.
“Ho nune’e, ami husu señor Ministru MAPKOMS atu ita-boot enkamiña urjentemente ba Ministériu Eduksaun atu bele halo asaun ruma hodi ajuda providénsia apoiu ba estudante sira. Tanba, sira barak mak inan-aman dook ho situasaun ida hanesan ne’e, ita presiza fó atensaun ba sira,” nia dehan.
Vise Prezidente PN ne’e dehan, iha ona apoiu ruma hosi Ministéiru Solidariedade Sosiál no Inkluzaun (MSSI) no madre sira hanesan ai-han maibé estudante sira hato’o katak sira-nia armajen ahi la han no la afeta ida, ne’ebé hahán di’ak hela no estudante sira-ne’e mós iha eskola prátika kuda modo, batar ne’ebé hahán laiha problema.
“So problema mak sira-nia nesesidade loloos apoiu lojístiku hanesan roupa, kulxaun, sabaun, ida-ne’e mak sira presiza,” nia dehan.
Hatán ba ida-ne’e, Ministru Asuntu Parlamentár no Komunikasaun Sosiál (MAPKOMS), Francisco Jeronimo, rejista hela kestaun ne’e no sei enkamiña ba ministéiru tutela hodi bele tau atensaun.
Jornalista : Nelson de Sousa
Editór : Cancio Ximenes
