COVALIMA, 03 abríl 2023 (TATOLI)–Membru Polísia Nasionál Timor-Leste (PNTL) na’in 30, tuir formasaun kona-ba tátika uza forsa ba prevensaun konflitu iha munisípiu Covalima.
“Formasaun ne’e importante ba ita-boot sira tanba hasa’e koñesimentu, abilidade no atitude, kuantu ita prenxe tolu ne’e, ita bele hatene saida mak profisionál. Atu profisionál hanesan polísia. Ita tenke hatene kona-ba lei servi ba ita-nia na’in. Ita tenke hatene ita-nia na’in nia hakarak sa ida,” Instruktór Sentru Formasaun Polísia, Inspetór Polísia José Lopes, hatetetn liuhosi nia diskursu, iha salaun komandu Covalima, segunda ne’e.
Tanba, nia dehan, povu hakarak membru PNTL tenke servi povu ho di’ak, entaun hatene de’it lei la to’o maibé tenke aplika, bainhira polísia halo atuasaun uza forsa ida-ne’e viola direitu umanu polísia halo atuasaun labele viola ba direitu umanu.
Ho nune’e, nia husu membru PNTL na’in 30 ne’ebé tuir formasaun tenke foku nune’e bele aumenta kuñesementu.
“Ha’u garante durante semana-ida ita-boot sira aprende ho di’ak, ita-boot sira sei hetán seguru tanba imi hatene ona aplika lei ne’e uza forsa direitu umanu sei la sala,” nia dehan.
Formasaun ne’e hala’o durante semana-ida ne’ebé membru na’in-30 sei aprende kona-ba direitu umanu no uza forsa no mós Ordem Publika no uza armas, hafoin teoria membru na’in-30 mós sei hala’o prátika iha kampu Ladi.
Konstituisaun RDTL, Artigu 147, Polísia no forsa seguransa sira, aliñea ba dahuluk, Polísia sei defende legalidade demokrátiku no garante sidadaun sira-nia seguransa internu maibé sira labele iha partidu polítiku.
Aliñea daruak Prevensaun kriminál tenke hala’o ho respeitu ba direitu umanu no aliñea datoluk, Lei mak sei harii rejime ba polísia no mós forsa seguransa seluk.
Jornalista : Celestina Teles
Editór : Cancio Ximenes
