Reprezentante espesiál hosi Sea Games entrega troféu ba PR
DILI, 03 abríl 2023 (TATOLI)—Reprezentante espesiál hosi Sea Games, segunda ne’e, entrega troféu Sea Games ba Prezidente Repúblika (PR), José Ramos Horta.
“Ohin, onra tebes nu’udar Komite Olímpiku Nasionál hamutuk ho reprezentante espesiál hosi Sea Games no mós Vise Ministru Turizmu nian mai hosi Kambodia hamutuk ho Emabixadór Kambodia ba Jakarta no mós iha Timor-Leste, mai atu entrega troféu Sea Games nian ba Prezidente Repúblika. No, troféu ida-ne’e hahú hosi Kambodia ba nasaun haat,” Prezidente Komité Olímpiku Nasionál Timor-Leste, Francisco Kalbuady Lay, hateten ba jornalista sira hafoin entrega troféu ba Prezidente Repúblika iha Palásiu Prezidensiál Nicolau Lobato, Bairru Pite.
Tuir ajenda, tersa (4/4) aban, sei hahú halaó serimónia simbóliku hamutuk ho atleta sira iha jináziu Dili lori troféu ne’e la’o no Prezidente Repúblika (PR) sei partisipa iha serimónia ne’e hamutuk ho atleta sira.
Kalbuady haktuir, durante sorumutu PR kongratula ba ASEAN liu-liu Kambodia hanesan uma-na’in ba Sea Games, nune’e PR sente kontente no onra tebes sira bele to’o mai Timor-Leste.
Enkuantu Sea Games ba tinan 2023 atleta timoroan hamutuk 54 mak sei partisipa ho modalidade ualu.
Segundu Vise Prezidente Komite Olímpiku, Vicente Carvalho, hateten nia-parte daudaun hanesan xefe misaun ba jogu Sea Games iha Kambodia, kona-ba preparasaun trata dokumentu dadaun kuaze 99% atu ba partisipa sea games.
Jornalista : Nelson de Sousa
Editór : Cancio Ximenes
