DILI, 04 abril 2023 (TATOLI)— Don Virgílio Kardeál do Carmo da Silva, SDB, husu sarani sira atu kontribui dame no paz iha momentu selebrasaun loron boot santa Páskua.
“Ita hakbesik dadaun ba Tríduo Páskua nian hanesan kinta feira santa, sesta feira santa no sábadu santu. Ho ida ne’e, mai ita hotu kontribui ba dame no paz iha momentu espesiál no istóriku ne’e. Tanba, iha kinta feira santa, Jesus fó mai ita eukaristia, nia hosik hela ezemplu ida servisu nian mak servi malu,” Don Virgílio Kardeál nu’udar mos Arsebispu Arkidioseze Metropolitana Dili, hateten iha Kámara Ekleziástiku Lecidere, Dili, tersa ne’e.
Don Virgílio haktuir, iha domingu resuresaun, Jesus moris hias fali no mosu ba eskolante sira hodi dehan ‘dame hela ho imi’. “Ida iha nia sentidu klean liu fali ida ita haree ho matan. Ida ne’e kona-ba ita ema nia drama moris nian,” nia dehan.
Don Virgílio dehan, iha tinan tolu liuba mundu silénsiu ho COVID-19 no espériensia ida ne’ebé ema hotu lakohi atu repete, bainhira movimentu hahú atu la’o di’ak oituan ona ho drama Ukraina nian ne’ebe dada tinan ida resin ona kontinua hanaruk povu ida ne’e nia terus no la hatene sei to’o bainhira.
“Situasaun ne’e lori ekonómia mundu hakdasak no to’o ohin loron ita seidauk hatene saida mak sei mosu iha loron aban. Situasaun ida ne’e lori ita iha Timor mós sente no afeta ba ita-nia moris sósiu, ekonómia no polítika railaran. Tanba ita mós depende ba nasaun sira seluk, realidade moris ne’ebé loron ba loron la’os fasil halo ema barak preokupa ho loron aban nian,” Don Virgílio hateten.
Nune’e, atu buka moris ne’ebé di’ak mak obriga timor-oan foin sa’e lubuk ida tenke hosik hela familia no rai ba buka moris iha ema-nia rai.
Tanba, Don Virgílio dehan, liuhosi dalan ida ne’e mak atu haforsa no hadia liu tan povu nia moris. Ho ida ne’e, liuhosi eleisaun Parlamentár povu sei fó fiar ba partidu polítiku sira ne’ebé iha duni kapasidade no autoridade atu jere rai ne’e nia rikusoin, ba povu ne’e nia di’ak.
Nia dehan, dala barak ema kontente no dala barak mós dada iis. Ida ne’e la’os de’it dezafiu maibé oportunidade ida atu hakat ba oin neineik, bebeik maibé metin no loloos. Hanesan ema hotu hatene Jesus, ema barak ne’ebé hetan traisaun no ema hatun. Ema balun mós dala-ruma sente buat hirak ne’e, hatene katak ema idaidak iha nia susar moris nian maske la hatudu Maromak ne’ebé hola isin ema nian.
“Iha Jesus Kristu fó hanoin mai ita katak ita la’os mesak, Maromak ne’e fiel no Maromak nunka sei abandona ita. Tan ne’e maluk doben sira, iha momentu Paskua nian, mai ita tau ita-nia atensaun tomak iha Kristu ne’ebé ho ita no nia ne’ebé promete, ha’u sei hela nafatin ho imi to’o tempu ne’e nia rohan,” Don Virgílio tenik.
Haree ba promote Jesus nian husu hotuhotu tau atensaun tomak iha esperansa la importa dezafiu saida de’it sei mai, tanba Maromak iha ne’ebá no nia bolu ema hotu fó hanoin ba malu hodi kontribui ba dame.
Jornalista : Arminda Fonseca
Editora : Armandina Moniz
