MTKI-Autoridade Viqueque koordena realiza kompetisaun pintura
VIQUEQUE, 04 abril 2023 (TATOLI)- Ministériu Turismu Komérsiu no Indústria (MTKI), liuhosi husi Diresaun Turismu, hamutuk ho Autoridade munisípiu Viqueque hahú halo koordenasaun hodi realiza kompetisaun pintura ba estudante sira iha munisípiu refere.
Objetivu loke kompetisaun ne’e atu ema estrajeiru no espesialista sira ne’ebé mai akompaña no haree direta fenómenu esklipse solár híbridu ne’ebé sei akontese iha loron 20 abríl 2023 atubele haree mos pintura hirak ne’e.
“Ami loke kompetisaun pintura ne’e ba estudante sira no kada eskola ida sei reprezenta ema na’in tolu. Ami mós sei introdús mós mapa turizmu Timor-Leste nian, atu sidadaun estranjeiru sira bele koñese fatin turístiku sira”, Xefe Departamentu Turístiku iha MTKI, Judit Bernardo de Carvalho, hateten ba jornalista sira hafoin, ramata enkontru koordenasaun ba kompetisaun iha salaun administrasaun Viqueque, tersa ne’e.
Nia hatutan, pintura ne’e kompetetór sira bele hili imajen sira-ne’ebé iha munisípiu Viqueque maka hanesan foho, bee-matan no uma lisan, depende ba estudante sira hili hodi halo dezeñu.
Iha kompetisaun ne’e pre-eskolár tolu, ensinu báziku tolu no senkunáriu tolu kada eskola ida reprezenta estudante na’in-tolu ho totál kompetitór na’in-32.
“Kona-ba premeiu, ami sei oferese osan ba manán na’in-sira hahú vensedór dahuluk to’o dahaat. Pintura sira-ne’e ami sei haree ida-ne’ebé di’ak. Ami sei lori ba rai iha sentru informasaun turizmu nian iha Dili, hodi vizitór sira bele haree icon Viqueque nian”, nia afirma nia hato’o.
Tuir planu kompetisaun pintura ne’e realiza iha loron 15 abríl iha suku Maluru, Beaço durante loron ida.
Iha biban hanesan, Administradór munisípiu Viqueque, Januario Soares “Bolly”, reforsa atividade kompetisaun pintura ne’e atu hatudu potensiál turizmu Viqueque nian ba sidadaun estranjeiru ne’ebé mai akompaña fenómenu naturál ne’e.
“Ha’u-nia esperansa ita hotu serbisu hamutuk hodi realiza atividade kompetisaun ida-ne’e, hodi bele la’o ho di’ak hodi hasa’e sira koñesementu ba pintura nian”, nia afirma.
Jornalista : Vitorino Lopes da Costa
Editór : Florencio Miranda Ximenes
