PNTL sei estabelese Sentru Komandu Kontrolu ba Eleisaun Parlamentár 2023

DILI, 04 abril 2023 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten iha Eleisaun Parlamentar tinan ne’e PNTL sei estabelese Sentru Komandu Kontrolu iha nasionál no iha munisípiu sira atu kontrola situasaun iha prosesu Eleisaun Parlamentár.
“Ita husu Komandu Operasionál nian atu halo sériu halo kontrolu no apoiu relasaun públiku nune’e ita estabelese Sentru Komandu Kontrolu iha munisípiu sira atu kontrola situasaun eleisaun lejislativa ne’e. Estabelesimentu sentru ne’e atu halibur komandante sira bainhira akontese buat ruma hodi fó orientasaun ruma ba malu, no sai mós hanesan sentru ba kooperasaun no formasaun nian,” Komisáriu Jerál Polísia Henrique da Costa hateten iha Suai Room, tersa ne’e.
Tanba ne’e, nia husu atu membru PNTL hotu presiza iha kontribuisaun no servisu hamutuk hodi bele asegura eleisaun lejislativa 2023 ne’e ho di’ak liután no bele hetan susesu.
“Ho ida-ne’e, ita presiza hamutuk. Ita hotu nia kontribuisaun no ami rua foin mai hodi lidera de’it maibé ita hamutuk mak bele iha susesu. Tanba ne’e, husu ita-boot sira atu nafatin kumpre regra Polísia nian no bainhira konta susesu iha eleisaun ne’e, ita hotu nia susesu no kontribuisaun,” nia dehan.
Tuir nia, sentru votasaun aumenta barak maibé problema rekursu umanu mak la to’o, nune’e husu atu servisu makaas liután tanba nesesidade serguransa nian husu membru PNTL hotu nia apoiu, nune’e bele lori susesu ba eleisaun ida-ne’e.
Komandante Komandu Operasaun PNTL, Superintendente Xefe Polísia, José Soares, hateten presiza esforsu hosi membru PNTL hotu-hotu atu bele garante Eleisaun Parlamentár no bele hetan susesu.
“Ho ita-nia esforsu tomak oinsá atu garante eleisaun parlamentár la’o ho di’ak hosi inísiu to’o formasaun Governu. Esforsu ne’ebé komandu halo ona kona-ba atualizasaun no formasaun tékniku no tátiku Polísia nian hodi kontrolu no responde ba orden públiku nian, ita la’ós uza forsa,” nia dehan.
Nia hatutan, eleisaun ida-ne’e la’o ho di’ak mak presiza instituisaun no parseiru xave sira-nia kolaborasaun hahú hosi líder polítiku sira, relijiaun, sosiedade sívil no hosi kamada oioin mak sai na’in.
“La’ós ami Polísia de’it mak hamriik mesak hodi halo servisu, lae. Maibé ita hotu nia kontribuisaun no kolaborasaun atu eleisaun parlamentár ne’e la’o ho di’ak no susesu, no ita fahe responsabilidade ba malu nune’e ema hotu sente katak ita hotu na’in ba eleisaun ne’e no asegura di’ak,” nia hateten
Maibé, nia dehan, tenke la’o tuir norma no regra ne’ebé iha nune’e bele hatuur iha koridór ne’ebé loos atu anin makaas maibé PNTL la nakdoko.
Komandante ba Programa Dezenvolvimentu Polísia Timor-Leste (TLPDP-sigla inglés) Darren Booy, hateten iha Eleisaun Parlamentár presiza asegura hodi koloka ba sentru votasaun sira iha teritróriu nasionál.
“Oinsá mak ita-boot sira koloka ita-nia membru nia disponibilidade iha sentru votasaun sira mak dahuluk oinsá mak ita koloka membru iha eleisaun no daruak mak oinsá ita koloka iha bulletin votu nian. Entaun ita haree katak presiza asegura tanba sentru votasaun nia kapasidade liu fali rekrusu umanu PNTL nian,” Darren dehan.
Entaun, nia dehan imposivél atu koloka iha sentru votasaun. Nune’e PNTL presiza halo inovasaun no mós halo jestaun ba risku ne’ebé ativu.
“Ho ida-ne’e ha’u enkoraja ita-boot sira oinsá atu estabelese no jere komandu kontrolu ne’ebé efetivu ba iha eleisaun ne’e. Ita estabelese sentru komandu no estabelese mós liña komnuikasaun ne’ebé klaru ia sentru votasaun sira,” nia hateten.
Aleinde ne’e, nia dehan, presiza halo relasaun di’ak ho líder polítika sira no komuidade mak indikasaun ne’ebé di’ak mak oinsá mak define kolokasaun rekrusu iha sentru sira.
Jornalista : Osória Marques
Editór : Cancio Ximenes

