STAE prepara viatura kuaze 600 tula materiál eleisaun ba munisípiu
DILI, 04 abríl 2023 (TATOLI)—Diretór Jerál Sekretariadu Tékniku Administrasaun Eleitorál STAE, Acilino Manuel Branco, dehan, STAE prepara ona viatura kuaze 600 atu transporta materiál eleisaun ba munisípiu sira iha territóriu nasionál.
“Ita prepra ona karreta purvolta 600 hodi tula ita-nia materiál ba munisípiu sira. Viatura ne’e mai ho tipu oin tolu (3) mak ida ita mobiliza viatura STAE nia rasik, seluk ita mobiliza viatura Estadu nian tomak tanba ita koordena hela Patrimóniu Estadu no seluk mak ita aluga karreta lokál, nune’e bele refleta ba kada postu no ba munisípiu sira,” Acilino hateten ba jornalista sira, iha STAE, tersa ne’e.
Atu fasilita transporta materiál ho di’ak no seguru mak presiza mós viatura Estadu nian tanba sasán barak no viatura STAE nia de’it labele kobre hotu.
“Ho viatura hirak nee’e ita garante tanba preparasaun atinje ona 80% no 20% ne’e sei kompleta prosesu eleisaun maibé ha’u fiar katak sei ho susesu no di’ak,” nia dehan.
Jornalista : Osória Marques
Editór : Cancio Ximenes
