DILI, 05 abríl 2023 (TATOLI)—Komisaun C trata asuntu Finansa Públika iha Parlamentu Nasionál (PN) rekomenda ba Governu atu tau atensaun ba fasilidade funsionáriu aduaneira ka Alfandega iha postu integradu Mota-Ain.
Komisaun C hato’o kestaun ne’e liuhosi relatóriu fiskalizasaun ba iha postu integradu Mota-Ain, munisípiu Bobonaro hosi loron 15-17 fevereiru 2023 no relatóriu ne’e aprezenta ona iha reuniaun plenária iha tersa (04/04) ne’e hodi husu parte ezekutivu atu tau atensaun.
“Rekomenda ba Ministériu Finansa (MF) atu tau atensaun ba fasilidade sira-ne’ebé mak funsionáriu Alfandega sira enfrenta hodi nune’e bele kria kondisaun serbisu ida di’ak iha postu integradu Mota-Ain, kria mós kondisaun di’ak ba funsionáriu sira-ne’ebé serbisu iha Mota-Ain hodi toba, atu nune’e labele toba de’it iha rai,” refere relatóriu komisaun C ne’ebé Agência Tatoli asesu, kuarta ne’e.
Iha relatóriu ne’e mós husu tau atensaun ba uniforme ba funsionáriu sira tanba tuir informasaun agora tinan hitu ona seidauk troka.
Ministériu Finansa (MF) presiza atu koordena ho Ministériu Obra Públika (MOP) hodi define medida karga ne’ebé bele transporta hosi fonteira tuir kapasidade estrada refere, nune’e bele minimiza estragu.
Iha parte seluk, komisaun mós aprezenta ninia relatóriu fiskalizasaun ba iha postu integradu Mota-Masin, munisípiu Covalima hosi loron 08-11 marsu 2023.
“Hosi vizita fiskalizasaun ne’e komisaun C rekomenda ba Govenru liu-liu ba Ministériu Finansa tau atensaun ba farda/uniforme ba funsionáriu aduaneiru sira tanbá tuir informasaun preokupasaun ne’ebé hato’o dehan farda ne’e uza tinan hitu ona,” relatóriu ne’e haktuir.
Nune’e nós tau atensaun ba osan transporte ne’ebé seidauk simu hosi funsionáriu sira kada fulan $25 ho xefe kada $60 durante fulan lima ona, no kria mekanizmu ne’ebé mak di’ak ba atendimentu hosi Banku Nasionál Komérsiu Timor-Leste (BNCTL) tenke funsiona permanente hala’o serbisu loro-loron iha fronteira Mota-Masin.
Ba Ministériu Interiór (MI) tau atensaun ba uniforme polísia imigrasaun, no ba Ministéiru Transporte no Komunikasau tau atensaun ba rekursu ne’ebé iha Dirasaun Nasionál Transporte Terrestre (DNTT), tanba iha postu integradu Mota-Masin hamutuk ema na’in-tolu de’it, nune’e husu aumenta funsionáriu bele halo serbisu atendimentu di’ak liután.
Relatóriu ne’e rekomenda atu kria mekanizmu fasilita transporte ka karreta ne’ebé mak atu tama ba Indonézia liuhosi fronteira Mota-Masin, la presiza tenke selu $10 iha Dili maibé buka solusaun atu selu de’it iha DNTT Suai.
Nune’e mós tau atensaun ba liña internet hodi fasilita serbisu di’ak liután, tanba durante ne’e operadór Timor Telecom mak fornese liña internet iha fronteira Mota-Masin, ho nune’e husu Governu atu halo tan kontratu ho operadór seluk hanesan Telkomsel ka Telemor.
Jornalista : Nelson de Sousa
Editór : Cancio Ximenes
