Nasaun membru CPLP rekoñese Zacarias Albano susesu iha nia servisu

DILI, 05 abríl 2023 (TATOLI) – Estadu membru Komunidade Koalia Lian Portugés (CPLP-sigla portugés) rekoñese Sekretáriu Ezekutivu CPLP, Zacarias Albano susesu iha nia servisu, depende observasaun hosi nasaun membru sira.

“Estadu membru hotu CPLP nian rekoñese ha’u nia lideransa durante tinan rua, ha’u lidera ne’e hetan susesu barak ba Komunidade Ko’alia Lian Portugués, hetan progresu barak iha área oinoin, ne’e-duni proposta Timor-Leste atu aumenta tan ha’u nia mandatu ba tinan rua to’o jullu 2025”, Zacarias dehan ba Agência TATOLI, liu hosi media sosiál WhatsApp, ohin.

Nia dehan, tuir estatutu CPLP nian, bainhira nasaun membru ida-nia ema sai ona hanesan Sekretáriu Ezekutivu ba tinan rua, kuandu halo servisu di’ak Estadu ne’e nia bele husu estende tan mandatu ba tinan rua.

“Governu Timor-Leste informa ona ba ha’u kona-ba atu estende tan mandatu ne’e, maibé ha’u prefere katak tuir estatutu organizasaun nian, Timor-Leste iha direitu atu propoin ha’u nia rekondusaun”, Zacarias afirma.

Nia revela, hanesan timoroan agradese no prontu atu servisu ho di’ak atu servi ba nasaun membru sira inklui Timor-Leste.

“Ha’u sempre prontu atu servisu ba ha’u-nia rai doben Timor-Leste,  durante ha’u-nia mandatu primeiru ne’ebé agora atu remata ona iha fulan agostu mai ne’e, ha’u sempre servisu ho laran luak, fó ha’u nia matenek no esperiénsia tomak hodi servi organizasaun internasionál ne’e liuliu ba nasaun membru sira no Timor-Leste”, nia relata.

Rekorda fali katak tinan ne’e CPLP sei realiza simeira Xefe Estadu no Governu iha São Tomé e Principe fulan agostu mai ne’e.

Nasaun membru CPLP kompostu hosi, Angola, Brazíl, Cabo Verde, Giné-Bisau, Giné Ekuatoriál, Mocambique, Portugál, São Tomé e Prínsipe no Timor-Leste.

Jornalista: Hortencio Sanchez

Editór : Zezito Silva