COVALIMA, 05 abríl 2023 (TATOLI)–Diretór Sekretáriu Tékniku Administrasau Eleitorál (STAE) Covalima, Francisco Gusmão, hateten hahú hosi fulan janeiru to’o marsu tinan ne’e, STAE rejista ona eleitór hamutuk na’in-2,325.
STAE rejista eleitór 2,325 ne’e. iha eleitór foun hamutuk na’in-942 kompostu ne’ebé kompostu hosi feto 506 no mane 436, no eleitór ne’ebé halo atualizadu hamutuk na’in-1,383 kompostu hosi feto 598 no mane 785.
“Bazea ba relatóriu resensiamentu eleitorál atualizadu baze dadus iha Covalima, hahú hosi fulan-janeiru to’o marsu tinan ne’e, ne’ebé tékniku sira halo atendementu ba eleitór sira-ne’ebé atualizadu no ami rejista eleitór hamutuk 2,325,” Francisco Gusmão hateten ba Agência Tatoli, iha nia kna’ar fatin, Kampung Baru, kuarta ne’e.
STAE halo atendementu ba sidadaun sira-ne’ebé hasai kartaun eleitorál ba postu administrativu neen (6) iha loron 17 fulan-janeiru ne’ebé sei remata iha fulan-juñu tinan 2023.
Antes ne’e, Agêcia Tatoli asesu dadus husi STAE Covalima haktuir katak rezultadu resensiamentu eleitorál no atualiza ba dadus iha Covalima iha tinan 2022 ne’e, eleitór hamutuk 48,830 ne’ebé kompostu hosi mane na’in-24,950 no feto na’in-23,880
Jornalista : Celestina Teles
Editór : Cancio Ximenes
