Tempu kuaresma, sarani katólika presiza halo reflesaun ba moris
VIQUEQUE, 07 abríl 2023 (TATOLI)-Padre Vigariu Nosa senora de Fatima, parokia Uatolari, munisípiu Viqueque, Heriberto Soares Pedro, hateten tempu kuaresma sarani katólika sira presiza halo reflesaun ba ida-idak ninia-an hodi hetan moris rohan la’ek.
“Ha’u sente orgullu ba sarani husi parokia Uatulari antuasismu tebes no sira-nia partisipasaun ba viaskra. Selebra kuaresma tinan ida ita selebra dala ida, nune’e sarani sira presiza halo reflesaun ba sira-nia an no hatene kle’an ba ita lala’ok nu’udar ema kristaun, ohin loron mosu buat oioin, maibe ita haree Jesus Crsito sakrifika nia an ba terus no mate, maibe liu loron tolu moris hias fali”, Padre Heriberto Soares Pedro, ba jornalista sira, hafoin ramata viasakra, iha postu adiministrativu Uatulari, sesta ne’e.
Nune’e, Amu selebrante ne’e husu ba sarani sira iha Uatulari presiza hato’o sira-nia ba limitasaun sira-ne’ebé hasoru durante moris nian tanba ema moris Maromak kria.
“Tan ne’e, ita mós hato’o ita-nia an ba situasaun sira-ne’ebé iha nune’e bele lori ita-nia an kona-ba limitasaun moris lolos tanba ita la’ós na’in ba moris, maibé na’in Maromak mak fó moris ba ita iha mundu ida-ne’e”, Pe.Heriberto afirma.
Iha fatin hanesan, Sarani katólika Uatulari, Paulo Hornai , haktuir sarani sira partisipa IHA prosesaun viasakra husi kapela Uaitame to’o iha Kalbairiu área Teba-Hira, suku Matahoi hodi adora na’in Jesus nian mate iha krus tanba soi sarani sira nia-sala.
“Tan ne’e sarani sira hamutuk hodi tuir prosesaun ne’e, ami nu’udar sarani refleta katak sala ne’ebé ami halo iha tinan ida-ne’e nian laran. Iha tempu kuaresma prepara an hodi hasaran-an liu husi Jesus kristu nian, sala ne’ebé ami halo bele hetan perdaun no hetan bensaun no grasa, nune’e iha tempu tuir mai ami bele halo mundansa ba ami-nia moris iha família no komunidade sira-nia leet”, nia hato’o.
Hafoin ramata viasakra sarani sira kontinu halo prosesaun ba Jesus nian mate iha igreja Nosa Senora da Fatima Uatulari, hafoin sarani ida-idak fila ba sira-nia uma.
Jornalista :Vitorino Lopes da Costa
Editór : Florencio Miranda Ximenes
