iklan

HEADLINE, SEGURANSA

Durante selebrasaun Páskua, PNTL Dili rejista kazu krime lima

Durante selebrasaun Páskua, PNTL Dili rejista kazu krime lima

Komandante Polísia Nasionál Timor-Leste (PNTL), Munisípiu Dili, Superintendente Xefi, Natercia Martins. Imajen Tatoli/Francisco Sony

DILI, 10 abríl 2023 (TATOLI)- Durante selebrasaun Páskua, Polísia Nasionál Timor-Leste (PNTL), Munisípiu Dili, rejista kazu krime lima, Komandante PNTL Munisípiu Dili, Natercia Martins, informa.

“Durante semana páskua, ita rejista insidente balun iha kapitál Díli, maibé la afeta ba komunidade sira nia serbisu no movimentu livre. Kazu violénsia ne’ebé ita rejista hanesan (violénsia) doméstika ho agresaun fízika ne’e akontese, maibé la liu lima ba leten, menus husi ida ne’e,” Komandante Natercia Martins hateten ba jornalista sira hafoin ramata partisipa treinamentu ba membru PNTL Munisípiu Díli, Forsa Reserva (Taskforce) na’in 100 ne’ebé iha Unidade Espesiál Polisia (UEP) Bairru-Pité, segunda ohin.

Tuir autoridade polisiál ne’e, kazu hirak ne’e la afeta ba iha selebrasaun misa Páskua, durante semana Santa, tanba  krime sira ne’e akontese PNTL halo prevensaun no situasaun la’o.

Nia informa, iha kazu joven sira iha bairru tuda-malu, maibé iha ikus ne’e  hahú menus kompara tinan sira liu ona ba kotuk,  tanba prezensa  PNTL Munisípiu Díli ne’ebé hetan apoiu husi Unidade tolu hanesan Unidade Espesiál Polísia (UEP), Unidade Polísia Maritima (UPM) no Unidade Patrullamentu Fronteira (UPF) destaka iha Aero Portu Internasionál  Nicolau Lobato Comoro .

“Joven sira komesa la tuda-malu ona, ne’e la’ós tanba PNTL, maibé sidadaun sira respeita hakru’uk ba lei. Katak, tuda-malu ne’e la di’ak. Sira sei hetan sansaun ho konsekuénsia husi sira-nia aktu ne’ebé mak sira komete,” Superentendente Xefe Polísia, Natercia Martins, hateten.

Ho nune’e, Komandante PNTL Munisípiu Dili ne’e apela ba komunidade tomak hela iha kapitál Dili serbisu hamutuk ho PNTL bainhira iha kazu krime, violénsia ruma mak akontese iha bairru-laran informa ba PNTL atu halo atuasaun hodi salva husi risku ba konflitu.

Iha biban ne’e, nia mós husu ba inan-aman sira katak kontrola oan sira nia movimentu hodi nune’e oan sira labele halo asaun krime.

Tanba tuir dadus ne’ebé komandu PNTL iha no identifika katak maioria labarik ho idade 16 mak envolve kazu krime. Tanba ne’e, PNTL konsulta ona ho Ministériu Públiku joven idade 16 mak halo krime tenki prosesu.

“Ita konsulta ona Ministériu Públiku labarik minoridade halo krime ita konta husi idade 16 mak sira envolve ita bele submete ona ba prosesu, tanba ne’e ita kumpri prosedimentu husi Ministériu Públiku katak joven ho idade menór halo ita tenke halo atuasaun,” Komandante Natercia haktuir.

Nia hatutan, kazu krime ne’ebé akontese dala barak mós PNTL deteta ne’ebé envolve   joven sira maioria kauza husi hemu tua lanu lahatene aan ikus halo kirme.

“Kazu violénsia, konflitu, ne’ebé mak mosu PNTL detein joven sira maioria kondisaun lanu, tanba hemu tua,” nia konklui.

Notísia relevante:Kontribui ba pás no estabilidade durante selebrasaun Paskua

Jornlista         : Natalino Costa

Editór             : Rafael Ximenes de A. Belo

iklan
iklan

Leave a Reply

iklan
error: Content is protected !!