DILI, 11 abril 2023 (TATOLI)— Husi janeiru to’o marsu Servisu Saúde Munisipiu Ermera rejista moras Infesaun Vias Respiratóriu Aguda (ISPA) hamutuk 3.000, Diretór Servisu Saúde Ermera, Joni Alves, informa.
“Moras ne’ebé durante fulan tolu rejistu aas iha Ermera mak Infesaun Vias Respiratóriu Aguda hamutuk 3.000 resin ne’ebé afeta ba labarik nomos ema boot sira,” Diretór Joni Alves, hateten iha salaun INS Comoro, ohin.
Moras ISPA ne’e, kada tinan, tuir ezekutivu ne’e katak sempre mosu tanba haree ba klima ne’ebé iha entaun oinsá halo prevensaun mak husu inan aman kuidadu oan sira la bele halimar iha rai -rahun laran no mós bee fo’er sira.
“Moras ISPA ne’e kada tinan ita sempre rejista no moras ne’e la’ós buat foun ba ita maibé nu’udar inan-aman kuidadu oan sira evita halimar iha rai-rahun no mós bee fo’er sira ,” nia akonsella.
Diretór Servisu Saúde Ermera, Joni Alves dehan, tratamentu ba moras ne’e profisionál saúde sira nafatin disponível hodi fó asisténsia médika ba pasiente sira to’o rekuperadu hodi fila ba sira-nia uma.
Tanba ne’e, nia husu ba populasaun sira bainhira halo viajen ruma uza máskara no fase-liman bebeik bainhira konsumu ai-han sira.
Kazu dengue lima afeta labarik
Kona-ba kazu dengue, Diretór Servisu Saúde Ermera, Joni Alves, informa, iha fulan marsu no abril Servisu Saúde Ermera, rejista kazu dengue hamutuk lima ne’ebé afeta ba labarik tinan ualu mai kraik.
“Kazu dengue ida ne’e ita foin rejista iha fulan marsu no mós inísiu fulan abril ne’ebé afeta ba labarik idade tinan ualu mai kraik no mós ema boot hamutuk na’in liman; tolu ita halo tratamentu iha Ermera to’o rekupera no rua mak ita halo transferénsia ba Hospitál Nasionál Guido Valadares (HNGV),” diretór ne’e informa.
Nia esplika, kazu dengue ida ne’e mosu tanba haree ba populasaun sira-nia ambiente sira iha bairru, suku ne’ebé sira hela ba entaun ekipa saúde tuun ba terenu halo intervensaun kedas.
“Halo prevensaun ba dengue liuhusi atividade promosaun, edukasaun iha komunidade, iha postu saúde no sentru saúde, tau ai-moruk kimiku iha tanki bee sira hodi oho susuk dengue nian no regra ai-moruk ba iha fatin risku sira ne’ebé iha,” pesoál saúde ne’e tenik.
Entretantu, relasiona ho medikamentu, tuir ezekutivu ne’e katak Servisu Saúde Munisípiu Ermera sufisiente hodi halo atendimentu ba populasaun sira.
Jornalista : Felicidade Ximenes
Editór : Rafael Ximenes de A. Belo
