iklan

BOBONARU, ELEISAUN, HEADLINE, MUNISÍPIU, SOSIEDADE SIVĺL

IKS, PSHT no Kolimau 2000 sei apoia PNTL Bobonaro garante pás iha kampaña eleitorál

IKS, PSHT no Kolimau 2000 sei apoia PNTL Bobonaro garante pás iha kampaña eleitorál

Hafoin partisipa serimónia palku dame autoridade protesaun sivíl ho entidade relevante sira no estudante, grupu arte-marsiál IKS, PSHT no Kolimau 2000 hasai foto hamutuk. Imajen Tatoli/Sergio da Cruz.

MALIANA, 11 abríl 2023 (TATOLI) – Grupu arte-marsiál Ikatan Kera Sakti (IKS), Persaudaraan Setia Hati Terate (PSHT) no arte-rituál Kolimau 2000 ne’ebé eziste iha munisípiu Bobonaro sei apoia no koordena ho Polísia Nasionál Timor-Leste (PNTL) hodi garante pás no establidade iha atividade kampaña eleitorál.

Prezidente PSHT munisípiu Bobonaro, Americo de Jesus, sei orienta membru sira iha suku 50, postu administrativu neen atu hakmatek hodi fó susesu ba festa demokrasia ne’e.

Notísia relevante: SEJD husu membru PSHT foun iha Bobonaro hatudu imajen di’ak ba sosiedade

“Ami-nia prezidente rasik fó hatene mai katak ita koopera hamutuk ho PNTL, ita-nia maun-alin sira-ne’ebé enolve-aan iha krime ruma karik, ita kaptura sira entrega ba seguransa, tanba ne’e ha’u husu ba membru PSHT iha suku 50 nia laran, imi hotu kria pás no dame iha distritu Bobonaro ne’e, nune’e eleisaun 2023 ne’e la’o ho susesu,” nia informa ba jornalista sira, iha Jináziu Maliana, tersa ne’e.

Reprezentante estrutrura IKS munisípiu Bobonaro, Feliçiano dos Santos, reforsa IKS mós preparadu kontribui másimu ba seguransa iha postu no suku sira nune’e atividade kampaña eleitorál tinan ne’e bele la’o iha ambiente dame nia laran.

“Ami IKS prontu 100% atu koopera hamutuk ho parte seguransa hodi kria estabilidade ba preparasaun kampañia no eleisaun ida-ne’e,” nia katak.

Iha fatin hanesan, Responsável Kolimau 2000 iha munisípiu Bobonaro, Luzinho da Costa Fernandes, promete sei apoia másimu, tanba festa demokrasiaa tinan lima realiza dala-ida atu hili partidu politiku reprezenta povu ba tuur iha Parlamentu Nasionál.

“Ha’u husu ba membru tomak iha munisípiu Bobonaro no 13 munisípiu inklui Atauro, atu idak-idak bele kontribui pás, dame iha idak-idak nia fatin hodi akompaña situasaun no programa polítika ne’ebé mak ita-nia lideransa sira atu mai fó ba ita,” nia apela.

Prezidente Sub-Komisaun Reguladora Arte Marsiál (KRAM), munisípiu Bobonaro, José Ramos, apela ba koordenadór grupu arte-marsiál no rituál sira atu hapara provizióriu atividade treinu iha fatin hotu durante kampaña eleitorál la’o to’o remata hodi kumpre rezolusaun governu ne’ebé fó-sai ona.

“Imi labele halo’o atividade lai, tanba movimentu militante partidu mai hosi aldeia no suku barak tebes, balun mai ho hanoin la hanesan, entaun imi mos hola parte hanesan liman ain governu nian, ha’u husu imi serbisu hamutuk ho seguransa atu ita-nia atividade kampaña no eleisaun iha ita-nia munisípiu ne’e bele la’o ho di’ak,” Jose Ramos katak.

Notísia relevante: Mauluta husu joven sira koopera ho PNTL Bobonaro kontrubui pás iha eleisaun parlamentár

Jornalista   : Sérgio da Cruz

Editór           : Evaristo Soares Martins

iklan
iklan

Leave a Reply

iklan
error: Content is protected !!