DILI, 11 abríl 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten jornalista sira hakna’ar-an iha mídia estatál midía TATOLI, I.P no Rádiu Televizaun Timor-Leste, Empreza Públika (RTTL, E.P) mak bele vota livre iha fatin ne’ebé sira halo kobertura bá.
Notísia Relevante: Kampaña eleitorál ba Eleisaun Parlamentár sei hahú iha 19 abríl
“Jornalista TATOLI, I.P ho RTTL, E.P mak bele vota iha fatin ne’ebé mak ita-boot sira halo knaar bá ka halo kobertura bá, maibé jornalista mídia privada seluk sei labele no tenke ba vota tuir nia kartaun eleitorál rejistu bá,” Diretór Jerál STAE ne’e ba Agência Tatoli, iha nia kna’ar fatin Caicoli, Dili.
Tuir nia, bazeia ba dekretu-lei eleitorál nian nune’e STAE hala’o tuir de’it saida mak hateten iha ne’ebá, anaunsér Xefe Estadu promulga altersaun lei eleitorál ba Parlamentu Nasionál nian ne’e, nune’e bele iha baze hodi la’o tuir.
“Iha ita-nia prosesu eleisaun ne’e la eziste ka la aplika buat ida vota livre, vota movél maibé iha ita-nia terminolojia sira baibain ita uza ida-ne’e. Maibé prosesu hirak-ne’e, ita uza mak vota ambulante ba maluk pasiente sira no ba sira iha prizaun. Seluk mak vota iha sentru paralelu, depois ida tan mak aplika ba ajente administrasaun públiku ka ajente Estadu ne’ebé presta serbisu iha ámbitu eleisaun, ne’e ita fó vota emissão do serviço,” nia esplika.
Maibé, ba jornalista sira mak ho termu ida dehan jornalista bele ba vota fatin ne’ebé mak nia halo kobertura bá., maibé ida-ne’e mós ba jornalista sira-ne’ebé hala’o servisu mídia Estatál de’it.
“Ba mídia privadu sira, nia bele hetan kartaun akreditasaun hosi STAE maibé nia nafatin vota tuir ninia unidade jeográfika. Ezemplu, jornalista ida hosi munisípiu A ba halo kobertura iha munisípiu B, nia bele vota maibé dala ida tan ne’e ba jornalista TATOLI ho RTTL de’it, ba jornalista sira servisu iha mídia privadu sira-ne’e, lae,” nia dehan.
Kona-ba kartaun akreditasaun, nia hateten, ida-ne’e hanesan rekezitu ida-ne’ebé STAE atribui hodi autoriza jornalista halo kobertura iha ámbitu eleisaun nian.
Nia esplika, ba jornalista sira-ne’ebé la vota iha fatin kobertura ne’e, STAE liuhosi Ministériu Administrasaun Estatál (MAE) propoin pontu balun hodi ajuda kria fatin paralelu sira, nune’e sira bele vota.
“Maibé ida-ne’e ita hein de’it ona tanba seidauk hetan promulgasaun hosi Xefe Estadu. Tanba ita halo ida-ne’e hodi fó tratamentu justu ba jornalista sira hotu. Tanba STAE bainhira halo nia servisu ne’ebé operasionliza ne’e tenke ho baze legál. Tanba bainhira laiha mínimu dekretu-lei ida mak STAE labele halo buat ida. Ho ida-ne’e, ha’u apela hela de’it ba Na’in-ulun sira atu konsidera alterasaun lei eleitorál ne’e importante no ida-ne’e mós lori aumenta taxa partisipasaun iha eleisaun ne’e,” nia dehan.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Osória Marques
Editór : Cancio Ximenes
