DILI, 11 abril 2023 (TATOLI)—Ministériu Turizmu, Komérsiu no Indústria (MTKI) liuhosi Diresaun Nasionál Komérsiu Internu, tersa ne’e, estabelese tan Loja do Povo iha munisípiu Manufahi, atu hakbiit no haburas ekonómia rai laran.
Ministru Turizmu Komérsiu no Indústria, José Lucas do Carmo da Silva, hateten, Governu liuhosi MTKI estabelese Loja do Povo ne’e atu bele deversifika ekonómia no halo rezilénsia soberania ai-han iha timor-oan nia liman rasik.
“Atividade ida hanesan ne’e oinsá ita hahú no haforsa ekonómia railaran atu bele deversifika ekonómia, no halo rezilénsia soberania ai-han iha timor-oan nia liman rasik. Nune’e ha’u husu ba grupu sira ne’ebé hola parte iha Loja do Povo, atu servisu hamutuk ho povu agrikultór sira hodi garantia sirkulasaun ai-han iha Munisípiu Manufahi,” José Lucas do Carmo da Silva, hateten liu hosi nota komunikadu ne’ebé Agência Tatoli, asesu tersa ne’e.
Notisia relevante : Ministériu Turizmu estabelese ona Loja do Povo hamutuk hitu
Membru Governu ne’e dehan, Polítika Governu atu garantia soberania ai-han iha Timor-Leste ne’e. Tanba Timor-Leste ukun rasik an ona atu keta depedénsia fali ba ai-han ne’ebe importa hosi rai liur. Nune’e, VIII Governu nia politika no programa harii Loja do Povo atu halo diversifikasaun ekonómia ne’ebé buras liu tan.
Jornalista : Arminda Fonseca
Editora : Armandina Moniz
