DILI, 11 abríl 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten observadór internasionál ba Eleisaun Parlamentár 2023 ne’e menus liu kompara ho eleisaun prezidensiál 2022.
“Tuir ami-nia observasaun ba observadór Internasionál menus tebes kompara ho eleisaun tinan kotuk. Tanba uluk iha tinan kotuk bainhira halo númeru sorteiu sira iha ne’e ona maibé agora lae. Ita lahatene tanbasá maibé ita haree sira-nia relatóriu ba eleisaun tinan kotuk nian hatudu katak sira apresia tebes ho ita-nia prosesu tomak la’o di’ak tebes no kumpre tuir lei haruka,” nia dehan ba Agência Tatoli, iha nia kna’ar fatin Caicoli, tersa ne’e.
Tanba, tuir nia, relatóriu ne’ebé STAE asesu liuhosi Ministériu Negósiu Estranjeiru no Kooperasaun (MNEK) katak Timor-Leste sai hanesan alvu prioridade ba sira hodi observa eleisaun.
Nia dehan, STAE hetan konfirmasaun katak vise Prezidente Asembleia Repúblika ho nia delegasaun mós hakarak partisipa iha eleisaun lejizlativa ne’e.
“Entaun ita haree hela nia preparasaun oinsá ita haree informasaun ne’ebé adekuadu para hodi fasilita ita-nia akreditasaun iha eleisaun parlamentár ne’e rasik. Nune’e mós, ha’u hetan konfirmasaun hosi Malaizia, Brunei, Japaun no foin daudaun ha’u simu karta hosi Indonézia ne’ebé iha interrese atu halo observasaun,” nia hateten.
Kona-ba observadór nasionál, nia hateten, ida-neébé rejistu ona FONGTIL, Fundasaun Mahein (FM), Yayasan HAK no seluk tan hahú aplika ona no iha interese atu halo observasaun.
Jornalista : Osória Marques
Editór : Cancio Ximenes
