DILI, 11 abríl 2023 (TATOLI)—Vise bankada Partidu Libertasaun Populár (PLP), Francisco Vanconselos, itersa neé, hateten bankada hato’o ona karta ba meza PN hodi fó koñesimentu hapara Deputadu Corneilo Gama ‘L7’ hosi kna’ar hanesan Xefe Bankada.
“Orientasaun prezidente interinu partidu PLP klaru, ohin, ami haruka ona karta ida ba meza Parlamentu Nasionál hodi fó koñesimentu la’ós suspende de’it maibé troka ka hapara Deputadu L7 hosi Xefe Bankada no Deputadu Domingas dos Santos mak sei asume fali nu’udar Xefe Bankada PLP nian,” Deputadu Francisco Vanconcelos hateten ba jornalista sira iha PN, tersa ne’e.
Nia hateten, liga ba kazu Deputadu L7 nian iha fatin barak nia deklara no halo entrevista nia hakarak apoiu partidu FRETILIN, entaun altura ne’eba husu nia bazea ba orientasaun partidu, husu nia opsaun ba nia mak ida nia renúnsia kau ida fali meza bele deklara perde mandatu bazeia ba proposta hosi partidu.
“Depois nia hatan tiha, liu tiha loron ida dehan, tuir loloos ha’u la ba ida maibé jenerál Lere mak bolu ha’u, soke ami liga ba ninia entrevista la’ós bolu maibé nia mak hakarak duni ba iha ne’eba,” nia dehan.
Nune’e, nia hateten asume responsabilidade ho konsekuénsia mós tanba nia Deputadu reprezenta mós partidu mak iha ne’e, mezmu ida-ne’e nia direitu maibé daudaun asume hela Deputadu no hanesan Xefe Bankada PLP ne’ebé reprezenta partidu, entaun partidu rasik iha regra atu regula.
Nia informa, hafoin ne’e partidu sei haree fali andamentu seluk konsulta ho parte tékniku haree prosesu atu halakon mandatu Deputadu L7 nian.
Vise Bankada ne’e hateten, ho deklarasaun Deputadu L7 nian ne’e la fó impaktu ba PLP nia votu iha eleisaun Parlamentár tanba ne’e pesoál.
Notísia Relevante: Deputadu L7 prontu kumpre desizaun saida de’it hosi PLP
Jornalista : Nelson de Sousa
Editór : Cancio Ximenes
