DILI, 11 abríl 2023 (TATOLI)—Parlamentu Nasionál (PN), tersa ne’e liuhosi reuniaun plenária aprova proposta rezolusaun númeru 28/V(5a)-akordu kona-ba serbisu aéro entre Repúblika Demokrátika Timor-Leste ho Repúblika Indonézia.
Nune’e mós, Parlamentu Nasionál aprova mós proposta rezolusaun númeru 29/V(5a)- akordu kona-ba serbisu aéro entre Repúblika Demokrátika Timor-Leste ho Repúblika Singapura, no rezolusaun rua ne’e aprova ho votu a-favór 39, kontra no abstensaun 0.
“Nune’e proposta rezolusaun rua ne’e aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN.
Tuir relatóriu paresér hosi komisaun B trata asuntu Negósiu Estranjeiru no Defeza ho Seguransa ne’ebé halo apresiasaun inisiál ba proposta rua ne’e ho konkluzasaun katak, importánsia promosaun dezenvolvimentu Timor-Leste ba iha setór aviasaun sivíl no entermu jerál konsidera iha planu rejionál no internasionál ba salvaguarda pradraun exelensia iha aviasaun sivíl internasionál Timor-Leste.
Nune’e, rekomenda aprova akordu internasionál ho apresiasaun, konsidera atuál estratéjiku define hosi Governu, iha salvaguarda konetividade RDTL ho kursiál aviasaun sivíl iha rejiaun no konsolida padraun internasionál iha aeroportu internasionál Nicolau Lobato iha Dili, ho objetivu espesiál hosi extensaun pista de aterragem 3km inerente ao actual processo de expansão 3 fases.
Firmar akordu entre parte, tuir mai remete ba Parlamentu Nasionál ASA-Malásia, ASA-Portugál no ASA-Reinu Unidu espesiál relevánsia hosi konetividade ho komunidade timoroan iha estranjeiru.
Rekomendasaun ikus mak salvaguarda kurtu prazu infraestrutura, meiu kapitál umanu ba apoiu setór aviasaun sivíl iha serbisu krítiku ho kontrolu tráfegu aéro, operasaun voo no resposta emerjénsia.
Ministru Transporte no Telekomunikasaun (MTK), José Agostinho, hateten akordu bilaterál iha transporte aéro entre Timor-Leste ho Indonézia ne’ebé mak asina tiha ona iha loron 27 jullu 2010 no mós akordu bilaterál entre Timor-Leste ho Singapura asina iha 03 juñu 2013.
Hosi akordu rua refere ne’e tama tiha ona operasaun ne’ebé halo ligasaun konetividade aéro hosi Denpasar mai Dili no Dili ba Denpasar ne’ebé ho voo regular dadaun ativa hela, no ba Singapura ne’ebé durante ne’e nia voo provizoriamente seidauk reativa fila- fali maske uluk iha ona ligasaun konetividade.
“Entaun hakarak husu ba Parlamentu Nasionál plenária ida ne’e, atu bele halo apresiasaun no aprovasaun dokumentu ne’e hodi bele ratifika, nune’e ba futuru fasilita ita-nia konetividade aéro entre nasaun tolu no fasilita movimentu populasaun,” nia dehan.
Jornalista : Nelson de Sousa
Editór : Cancio Ximenes
