DILI, 11 abríl 2023 (TATOLI) – Ministru Edukasaun, Juventude no Desportu, Armindo Maia, informa Primeiru-Ministru (PM), Taur Matan Ruak, sei halo inaugurasaun ba infraestrutura edukativa hamutuk 59, iha postu administrativu Maliana, munisípiu Bobonaro.
“Konvida Primeiru-Ministru hodi partisipa iha eventu rua, ida maka inagurasaun faze daruak infraestrutura edukativa ne’ebé tuir planu sei hala’o iha 17 abríl 2023. Iha eskola foun hamutuk 59 atu inaugura hahú hosi ensinu pré-eskolár to’o sekundáriu ne’ebé mai hosi projetu komunitáriu no kapitál dezenvolvimentu”, Armindo Maia hateten hafoin relata progresu serbisu Ministériu Edukasaun ba Xefe Exekutivu, iha Palásiu Governu, tersa ne’e.
Governante ne’e esplika katak infraestrutura edukativa ne’e kompostu hosi sala aula, sala ba profesór, instalasaun sanitária, laboratóriu no bibiloteka. Eskola foun hamutuk 59 iha sala aula besik 200.
Infraestrutura edukativa sira ne’e harii iha territóriu nasionál ne’ebé gasta Orsamentu Jerál Estadu (OJE) tinan 2021 ho valór millaun $25.
Iha janeiru 2023, inagura uluk ona konstrusaun eskola faze dahuluk hamutuk 94 ho sala aula hamutuk 312. Iha eskola besik 70 iha faze konstrusaun no finalizasaun. “Iha fin fulan-maiu 2023 bele inagura ona”, nia salienta.
Biban hanesan, Xefe Ezekutivu mós sei halo lansamentu fatuk dahuluk ba eskola hamutuk 86 ne’ebé tama iha orsamentu tinan 2023 nian. Serimónia ne’e sei hala’o iha postu administrativu Maliana Vila, munisípiu Bobonaro.
Ministériu Edukasaun aloka, iha tinan ne’e, millaun $30 hodi konstrui no reabilita infraestrutura eskolár, hosi ne’e millaun $15 mai hosi fundu emprésimu hosi Banku Mundiál.
Jornalista: Antónia Gusmão
Editora: Maria Auxiliadora
