DILI, 11 abríl 2023 (TATOLI) – Governadór Timor-Leste ba Banku Mundiál no Fundu Monetáriu Internasionál (BM/FMI), atuál Ministru Finansa, Rui Gomes, reprezenta Governu hodi partisipa, entre 10 no 16 abríl, iha Reuniaun Primavera Konsellu Governadór Grupu BM no FMI ne’ebé realiza iha Washington DC, kapitál Estadu Unidu Amerika.
Tuir kalendáriu, Governadór Rui Gomes ho delegasaun Timor-Leste sei hala’o reuniaun bilaterál ho xefe foun Misaun Artigu IV, FMI ho nia ekipa.
“Iha reuniaun ne’e parte rua sei diskute kona-ba data fixu vizita Misaun Artigu IV bá Timor-Leste ne’ebé mak sei realiza iha segundu semestre 2023 hafoin Timor-Leste realiza Eleisaun Parlamentár”, haktuir nota ne’ebé Tatoli asesu, tersa ne’e.
Delegasaun Timor-Leste sei hala’o mós reuniaun ho Vise-Prezidente International Finance Corporation (IFC) hodi ko’alia kona-ba asisténsia téknika ne’ebé mak durante ne’e IFC fó mai Governu, partikularmente ba projetu sira estratéjiku ne’ebé ho modalidade Parseria Públiku-Privada (PPP) hanesan Portu Tíbar, redezenvolvimentu no komersializasaun Portu Dili, projetu Diagnóstiku Saúde, inklui PPP ‘Uma Kualidade ho Presu Asesível’ ne’ebé Ezekutivu konsidera nu’udar direitu umanu báziku no fundamentál ba timoroan nia saúde no moris di’ak.
Iha ámbitu Reuniaun Primavera 2023, delegasaun Timor-Leste mós sei hala’o enkontru ho Diretór-Ezekutivu Banku Mundiál Grupu Konstituente EDS21 ne’ebé mak Timor-Leste no Portugál hola parte ba.
Aleinde ne’e, sei hala’o mós reuniaun ho Diretór-Ezekutivu FMI Grupu Konstituente Brazíl ne’ebé mak país membru CPLP hanesan Timor-Leste, Cabo Verde no Brazíl hola parte hotu.
“Ministru Finana, Rui Gomes, no Governadór Banku Sentrál Timor-Leste, Abraão de Vasconcelos, ne’ebé mós hanesan Governadór suplente Timor-Leste iha FMI sei reprezenta Timor-Leste hodi partisipa iha reuniaun altu-nível ne’e”, nota afirma.
Nafatin iha ámbitu Reuniaun Primavera ne’e, Timor-Leste mós sei partisipa iha Reuniaun Ministeriál kona-ba ‘Dezenvolvimentu Umanu’ iha ne’ebé Governadór Rui Gomes sei reprezenta nasaun hodi hato’o intervensaun sobre Dezenvolvimentu Umanu iha Timor-Leste, área prioritária ida husi Governu Dauluk ne’ebé mak tau ‘Ema nu’udar Sentru ba Dezenvolvimentu’.
Entre reuniaun altu nível hirak ne’e, Rui Gomes mós reprezenta Governu hodi hato’o intervensaun iha Reuniaun Ministeriál entre país membru g7+ ho tópiku ‘Addressing Fragility and Conflict amid New Challenges’. Eventu ne’e organiza husi FMI ho serbisu hamutuk ho Sekretariadu g7+ ne’ebé lidera husi Sekretáriu-Jerál g7+, Helder da Costa.
Rekorde katak kada tinan Governu Daualuk lideradu husi Primeiru-Ministru, Taur Matan Ruak, aloka orsamentu millaun $1 ba Sekretariadu g7+ hodi apoia nia servisu diplomasia iha nível internasionál, halo advokasia kona-ba polítika globál hodi responde ba konflitu no frajilidade.
Iha 16 abríl, Rui Gomes sei halo intervensaun iha Reuniaun Ministeriál entre Grupu Vulnerável 20 (V20).
Durante partisipasaun iha Reuniaun Primavera ne’e, Governadór Rui Gomes ho delegasaun Timor-Leste hetan akompañamentu husi Enkarregadu Negósiu Embaixada Timor-Leste iha Washington DC, Embaixadór António Araújo.
Delegasaun Timor-Leste sei fila hikas mai nasaun iha 17 abríl.
Jornalista: Antónia Gusmão
Editora: Maria Auxiliadora
