DILI, 12 abril 2023 (TATOLI) – Diretora Ezekutiva Ospitál Referál Maubisse, Gabriella da Conseição Magno Perreira, informa hahú janeiru to’o marsu, Ospitál Referál rejista kazu dengue hamutuk 10.
“Durante fulan tolu ne’e, ami rejista kazu dengue hamutuk 10, husi númeru ne’e afeta ba labarik sira tinan lima mai kraik, maibé ami halo tratamentu to’o rekuperadu hotu”, Gabriella da Conceição Magno Perreira dehan bainhira partisipa iha forúm projetu pilotu implementasaun padraun iha City8 Manleuana, ohin.
Nia informa, kazu dengue ida ne’e mosu tanba haree ba populasaun sira nia ambiente iha bairo ne’ebé sira hela ba. Entaun bainhira kazu ne’e mosu iha área risku sira ekipa saúde tun ba terenu hodi halo intervensaun kedas.
“Atu halo prevensaun ba dengue liuhosi atividade promosaun edukasaun iha komunidade, iha postu saúde no sentru saúde, tau aimoruk kímiku tanke tau iha bee hodi oho susuk dengue no rega aimoruk ba iha fatin risku sira ne’ebé iha”, nia esplika.
Nia dehan, estoke aimoruk fomigasaun sei sufisiente hela hodi halo intervensaun bainhira kazu iha.
Jornalista : Felicidade Ximenes
Editór : Zezito Silva
