DILI, 12 abríl 2023 (TATOLI)– Konsellu Ministru aprova projetu Rezolusaun Governu nian, ne’ebé aprezenta husi Ministru Agrikultura no Peska, Pedro dos Reis kona-ba Polítika Nasionál Oseanu Timor-Leste nian.
“Objetivu jerál husi Polítika Nasionál Oseanu Timor-Leste nian atu fornese diresaun estratéjiku ida-ne’ebé klaru ba organizasaun relevante sira hotu iha matéria ida-ne’e”, Ministru Prezidénsia Konsellu Ministru, Fidélis Leite Magalhães haktuir hafoin reuniaun ezekutivu, iha Palásiu Governu kuarta ne’e.
Polítika ida ne’e hodi kontribui ho forma ida-ne’ebé integrada hodi aborda kestaun sira ne’ebé relasiona ho oseanu no hodi halo planeamentu no jestaun ba futuru utilizasaun husi oseanu sira hodi fó benefísiu ba jerasaun sira agora no ba futuru, kontribui mós ba dezenvolvimentu no kreximentu ne’ebé sustentavel ba ekonomia azúl no Objetivu Dezenvolvimentu Sustentavel (ODS) nian.
Portavós Governu esplika katak ne’e polítika-jerál ida tanba tinan barak ona iha diskusaun maibé seidauk aprovasaun finalmente Governu aprova Polítika-ida ne’e, no ida ne’e sei sai hanesan mata-dalan ida ba iha ita-nia intervensaun sira iha futuru iha Timor-Leste nia tasi.
Jornalista : Antónia Gusmão
Editór : Rafael Ximenes de A. Belo
