DILI, 12 abríl 2023 (TATOLI)– Konsellu Ministru aprova ona projetu Dekretu-Lei, ne’ebé aprezenta husi Vise-Primeiru-Ministru no Ministru Planu no Ordenamentu, José Maria dos Reis kona-ba Planu Nasionál Ordenamentu Territóriu (PNOT- TL).
“PNOT- TL ne’e hanesan ezersísiu dahuluk husi planeamentu territoriál ba nível nasionál ne’ebé realiza ho enkuadramentu legál no institusionál ne’ebé adekuadu, haree promosaun ba modelu ida dezenvolvimentu nasionál sustentavel no inkluzivu”, Ministru Prezidénsia Konsellu Ministru, Fidélis Leite Magalhães, haktuir, hafoin reuniaun ezekutivu, iha Palásiu Governu kuarta ne’e.
Nia hatutan planu ne’e sei aplika ba territóriu tomak Timor-Leste nian, inklui mós ba Rejiaun Administrativa Espesiál Oé-cusse Ambeno (RAEOA) no illa sira Ataúro no Jaco, ho área ida-ne’ebé hamutuk 14.919 km² no governa husi prinsípiu sira partisipasaun nian, subsidiariedade, prevensaun, prekausaun, ekuidade ka solidariedade sosiál, no efisiénsia ambientál no sosiál.
Nune’e, sei Propoin medida planeamentu 61 no asaun sira hamutuk 117 ne’ebé sei implementa iha domíniu lima maka, ambientál, rede urbana no povoamentu rurál, produtivu, infraestrutura no ekipamentu sira, no institusionál no organizasionál.
PNOT-TL ne’e hanesan instrumentu dezenvolvimentu territoriál ida-ne’ebé estabelese ba opsaun boot sira hodi organiza territóriu nian, ho objetivu atu promove dezenvolvimentu integradu ida, armoniozu no sustentavel ba país, atu garante koezaun territoriál no atu hamenus asimetriál territoriál sira. Ho objetivu mós atu haforsa territóriu hanesan fatór integradór ba polítika sira setoriál nian no orienta polítika territoriál eskala ki’ik sira.
Portavós Governu subliña Planu Nasionál Ordenamentu Territóriu nian sei konstitui hanesan instrumentu-xave hodi estabelese sustentabilidade ba baze sira dezenvolvimentu sosiál, territoriál no ekonómiku Timor-Leste nian, promove integrasaun setór sira hanesan saúde, edukasaun, komunikasaun, transporte sira, ba enerjia no ba ekonómika nasionál, hadi’a sistema dezenvolvimentu urbanu no rurál, ba nivel nasionál, munisipál no lokál, ho konsiderasaun ba dimensaun ambientál.
Jornalista : Antónia Gusmão
Editór : Rafael Ximenes de A. Belo
