STAE Viqueque husu eleitór foun konfirma naran iha sede suku
VIQUEQUE, 12 abríl 2023 (TATOLI)— Diretór Sekretáriadu Tékniku Administrasaun Eleitorál (STAE), munisípiu Viqueque, Humberto Fernandes, husu eleitór foun sira, iha munisípiu Viqueque atu hakbesik aan ba kada sede suku hodi konfirma naran ne’ebé taka ona iha sede suku, nune’e bele hadi’a bainhira iha erru ruma.
“Ha’u hakarak informa ba eleitór sira liuliu, eleitór foun sira ba haree ida-idak ninia naran keta sala karik konfirma hodi hadi’a tanba STAE Viqueque hahú distribui lista eleitór, iha loron 9 no sei taka iha loron 16 abríl ne’e. Konfirma imi-nia naran karik sala ba munisípiu hodi hadi’a atu bele partisipa votasaun”, Humberto Fernandes, hateten ba Agência Tatoli, iha postu Viqueque-Villa, kuarta ne’e.
Diretór STAE ne’e hatutan, daudaun ne’e brigada sira halo mós koodernasaun ba xefe aldeia sira hodi fó hetene ba sira abitante sira hodi bá sede suku hodi komfirma sira nian naran.
“Ohin, ha’u haree iha sede suku Macadique kuaze abitante sira barak maka halo konfirmasaun ba sira-nia naran. Lista eleitór sira nian distribui hotu ona ba sede suku 36 iha munisípiu Viqueque”, katak.
Aleinde ne’e, nia husu, ba eleitór sira-ne’ebé maka kartaun tohar no lakon dentru husi loron 9 to’o lorom 16 ba STAE munisípiu Viqueque hodi hadi’a sira nian kartaun.
“Kona-ba sinkroniza dadús eleitór ita halo hotu ona, ne’ebé lista sira-ne’e laiha mudansa. Ida ne’ebé kartaun lakon no tohar ne’e tenke ba munisípiu tanba mákina ida de’it ona maka iha munisípiu”, katak.
Tuir dadús eleitór munisípiu Viqueque iha tinan 2023 hamutuk na’in-696, kompostu husi eleitór mane na’in-385 no eleitor foun feto na’in-311. Eleitór husi tinan 2022 totál na’in-58.776.
Enkuantu, sentru votasaun sei estabelese iha munisípiu Viqueque ba eleisaun parlamentár hamutuk 112 no estasaun votasaun 135.
Jornalista: Vitorino Lopes da Costa
Editór : Florencio Miranda Ximenes
