CNE lansa plataforma tabulasaun dijitál ba Eleisaun Parlamentár
DILI, 13 abríl 2023 (TATOLI)—Komisaun Nasional Eleisaun (CNE), kinta ne’e, lansa ona plataforma tabulasaun dijitál ba Eleisaun Parlamentar (ElPar) tinan 2023 hodi fornese informasaun eleitorál ho efisiénsia no efetivu durante eleisaun.
“Estabelese plataforma tabela dijitál atu hadi’a kapasidade dijitál no fahe informasaun hosi órgaun jestaun eleitorál sira. Ida-ne’e permite sira atu fornese informasaun eleitorál ho efisiénsia no efetivu durante eleisaun,” Prezidente CNE, Jose Agostinho Belo, iha lansamentu plataforma tabulasaun dijitál, CNE, Colmera, kinta ne’e.
Tempu agora, ho sistema tabulasaun dijitál CNE nian sei realiza nivel transparénsia ne’ebé aas liu iha nivel tabulasaun CNE nian, no ema hotu ne’ebé iha asesu ba internét bele haree estatutu servisu tabulasaun nian no mós ho nia rezultadu kedas.
Aleinde ne’e, públiku bele haruka keixa ka inkeritu diretamente ba CNE liuhosi plataforma dijitál no kalkuladór automátika ba distribuisaun kadeira ne’ebé sei fasilita asesibilidade utilizadór sira.
“Plataforma tabulasaun dijitál mak sistema inovativu no esensiál ida-ne’ebé garante transparénsia iha prosesu eleitorál no fasilita envolvimentu publiku. Ami apresia tebes apoiu ne’ebé Governu Japaun no PNUD kontinua oferese ba ami,” nia dehan.
Deputy Chief of Mission iha Timor-Leste, Kazumi Yamada, hateten liuhosi plataforma tabulasaun dijitál bele haree progresu apuramentu nian.
“Agora ho sistema apuramentu dijitál CNE nian, transparánsia ho grau maka’as liután sei hala’o iha nivel apuramentu CNE nian. Nune’e ema hotu ne’ebé iha asesu ba internet sei bele haree progresu servisu apuramentu nian nomós ninia rezultadu,” Kazumi haktuir.
Ida-ne’e favoravel ba objetivu hosi Projetu CORE-TL nian, ne’ebé sistema ne’e dezenvolve iha nia okos tanba povu la presiza atu halibur iha espasu kiik hodi observa progresu ka rezultadu tabulasaun nian.
“Ami urgullu hodi bele fornese kontribuisaun finanseira ba sistema ne’e, ne’ebé CNE dezenvolve ho asisténsia husi ami nia parseiru PNUD. Ha’u hatene ona katak iha Timor-Leste, prezensa eleitór sira-aas liu entre sira seluk iha Sudeste Aziatiku, iha ne’ebé votante sira sei forma iha liña naruk ka halo viajen durante oras naruk hodi hakat ba sentru votasaun fó sira nia votu. No mós katak dever sívika ida-ne’e sei la haluha mezmu depois sira pasa vida tinan ba tinan iha nasaun seluk. Ha’u fiar katak sistema ne’e sei ajuda fornese transparánsia ne’ebé merese ba povu sira ne’e,” nia hateten.
Japaun iha kompromisu atu kontinua apoia Timor-Leste enkuantu Timor Leste avansa iha ninia alvu hodi konsolida liu tan ninia demokrásia no mós dezenvolvimentu ekonómiku nian.
Reprezentante Rezidente PNUD, Munkhtuya Altangerel, hateten CNE nia plataforma dijitál permite sidadaun sira atu asesu ba informasaun ofisiál eleitorál nian no ida-ne’e kontribui ba governasaun demokrátiku iha Timor-Leste.
“Ida-ne’e importante tanba órgaun ofisiál jestaun eleitorál nian, CNE iha fonte fundamentál ida ba informasaun eleitorál ba sidadaun hotu. Ida-ne’e asegura transparensia iha prosesu eleitorál,” Reprezentante Rezidente PNUD, Munkhtuya Altangerel, hateten.
Plataforma dijitál ne’e hetan apoiu hosi projetu Programa Nasaun Unida ba Dezenvolvimentu (UNDP) Eleisaun Reziliente ba COVID iha Timor-Leste (CORE-TL) ne ebé finansia hosi Governu Japaun.
Hein katak sei fornese informasaun ne’ebé justu no loloos ba sidadaun sira liu 10.000, liuhosi plataforma dijitál, sira bele hetan asesu lalais ba tabulasaun dijital no rezultadu votasaun bainhira CNE simu aktu munisípiu ka rejional no dadus hosi STAE.
Jornalista : Osória Marques
Editór : Cancio Ximenes
