DILI, 13 abríl 2023 (TATOLI)- Ekipa primeira divizaun Liga Futeból Timor-Leste Karketu Dili FC susesu iha nia jornada hodi halakon adversáriu Academica FC ho rezultadu 2-1.
Jogu ba ekipa rua hala’o iha Estádiu Munisipál Dili, kuarta lorokraik hanesan jogu kontinuasaun Liga Futeból Timor-Leste (LFTL) époka 2022-2023.
Hanesan baibain jogu hahú ekipa rua lansa kedan kontra no atake ba malu tuir tékniku no abilidade ekipa ida-idak nian atu hatama golu nune’e bele fó vitória ba ekipa ida-idak.
Jogu la’o to’o minutu 45 iha primeira parte nian ekipa rua seidauk halo golu ba malu ho nune’e tenke termina jogu ho rezultadu empata 0-0 no jogadór sira tenke deskansa minutu 15 hafoin kontinua fali iha minutu 45 segunda parte.
Hakur ba segunda parte jogu manas ona ho nune’e iha minutu 51 jogadór Karketu Augosto da Costa (80) konsege fura ona golu primeiru ba Academica muda rezultadu ba 1-0.
Ho nune’e jogu kontinua la’o Academica esforsu maka’as atu hatama golu maibé la konsege ho nune’e Karketu kontinua luta maka’as iha minutu 64 jogadór Gaudencio Monteiro (7) lansa tan golu segundu muda kedan rezultadu ba 2-0.
Hosi golu ne’e halo Academica atrapalla maka’as no tenke servisu maka’as iha kampo laran.
Servisu ne’ebé Academica halo la hela de’it hanesan esforsu tanba iha minutu 77 jogadór Academica Lexi Junior Atok (26) konsege responde golu ida muda rezultadu ba 2-1.
Golu ne’e hanesan golu ikus liu ba ekipa rua nune’e minutu 90 termina laiha tan golu ruma mak akontese ba ekipa rua vitória hela ba Karketu no Academica hela ho derrota.
Eskuad Karketu:
Georgino da Silva (31), Zacarias Cabral (32), Domingos Ramos (5), Pedro Vicente (4), Celsio Eskurial (16), Orcelio Novelito (3), Augosto Ramos (80), Januario Fonseca (17), Gelvanio Alberto (10), Mauricio Gonzales (11), Janet Kamare (25).
Suplente:
Ricardo Nunes (20), Antonio Provirio (23), Jorge Savas (22), Gaudencio Monteiro (7), Antonio Martins (2), Silvestre Gama (29), José Fernandes (19), Olegario Boavida (6), Paulo Galy Freitas (21).
Treinadór: Vicente Ramos Freitas
Eskuad Academica:
Otilio Guterres (30), Leandro Amaral (16), Calistro Pereira (22), Lexi Junior Atok (26), Filipe Alves Ling (5), Alexandre da Cruz (10), Juvinal Boavida (19), Helder Lopes (17), Hilario Ximenes (11) Daminaus Putra (12), Nortey Kojo (18).
Suplente:
Jemecriz Pereira (1), Erolizmo Martins (4), Joel Gaio (6), Helmerino da Costa (8), Florindo Soares (21), Melchor Cristovão (14), Dani Ardianto (2).
Treinadór: Lusinho Saco
Tabela klasifikasaun provijoriu primeira divizaun
- AD SLB ho pontu 14
- AS Ponta Leste ho pontu 10
- Karketu Dili FC ho pontu 9
- Emanuel FC ho pontu 9
- Porto Taibessi FC ho pontu 8
- Assalam FC ho pontu 8
- Atletico Ultramar/Coração ho pontu 5
- Academica FC ho pontu 5
- Aitana FC ho pontu 4
Hosi tabela klasifikasaun ne’e hatudu katak ekipa ne’ebé kandidatu forte ba kampiaun mak AD SLB tanba ho pontu ne’ebé boot liu ekipa seluk maibé ekipa seluk hanesan Ponta Leste no Karketu Dili FC sei iha posibilidade ba kampiaun karik SLB falla iha jogu rua ikus no ekipa rua seluk nunka lakon mak sira sei kampiaun.
Hosi tabela ne’e rasik hatudu mós ekipa Academica no Aitana mak iha lina ikus liu no sira na’in rua mak sei hadau malu atu degrada ba segunda divizaun se los mak atu tun rezultudu sei hein iha jogu sira tuir mai.
Jornalista : Hortencio Sanchez
Editór : Rafael Ximenes de A. Belo
