Kazu rai Becuse, KSMJ konsidera desizaun Tribunál adekuadu
DILI, 12 abríl 2023 (TATOLI)-Konsellu Superiór Majistratura Judisiáriu (KSMJ), konsidera desizaun Tribunál Judisiál Primeira Instánsia ba prosesu kazu ezekusaun (eviksaun) halo hasoru família uma-kain hitu iha área Becuse, Suku Becora, Postu sdministrativu Cristo Rei, munisípiu ne’e adekuadu.
Tanba ne’e, liuhosi inspesaun ne’ebé mak parte inspetór judisiál sira halo ba sentensa ne’ebé foti hosi Juíza Titulár ba prosesu rai Becuse Zulmira Auxiladora Barros la iha irregularidade ruma no konsidera katak desizaun ne’ebé maka Juíza foti liuhosi Tribunál Judisiál Primeira Instánsia ne’e adekuadu no tuir duni prosesu normál.
“Husi averigasaun ne’ebé refere servisu inspesaun judisiál hola konkluzaun katak laiha konduta / hahalok sira ne’ebé bele fó fatin atu tau responsabilidade disiplinar ba majistradu judisiál ne’ebé ka’er prosesu ne’e rasik. Tanba prosesu ne’e la’o hanesan baibain tuir nian regularidade no kumpri ona norma prosesuál sivil sira ne’ebé vigora iha Timor-Leste,” Sekretariu Konsellu Superiór Majistratura Judisiáriu (KSMJ), Antoninho Gonsalves, hateten ba jornalista iha Sala Audiénsia Julgamentu Tribunál Rekursu iha Caicoli, kinta ne’e.
Nia esplika, liga ho desizaun ne’e , mosu preukupasaun barak hosi públika kona-ba desizaun Tribunál Judisiál Primeiru Instánsia nian ba rai Becuse, ho nune’e, Konsellu Superiór Majistradu Judisiál husu ba Inspetór Judisiál atu halo inspesaun ba desizaun Juíza Zulmira Auxiliadora Barros ba kazu rai Becuse.
“Meiu ida ne’e Konsellu Majistratura Superiór Judisial halo la’ós atu interven Tribunál Judisiál Primeiru Instánsia nia desizaun liuliu desizaun Juíz Titulár ne’ebé kazu ne’e, maibé tuir kompeténsia sira ne’ebé lei fó KSMJ mak konsellu husu ba inspesaun judisiál nian hodi hala’i averiguasaun , servisu inspesaun judisiál atu aplika sansaun disiplina ba majistratura judisiál ne’ebé ka’er prosesu ne’e, maibé hafoin inspetór judisiál halo tiha averiguasaun no relata ba rezultadu inspesaun ba Konsellu katak desizaun Juíz nia ne’e la’o hanesan baibain tuir nian regularidade no kumpri ona norma prosesuál sívil sira ne’ebé vigora,” Antoninho Gonsalves esplika.
Nia dehan, ho rezultadu inspesaun ne’ebé inspetór Judisiál halo KSMJ konsidera desizaun Tribunál Judisiál Primeiru ne’e kontinua ba iha prosesu ezekusaun (evikasaun) ezekusaun koersiva ba sentesa katak família uma-kain hitu atu entrega rai ka imovel.
Tanba desizaun Tribunál Judisiál Primeira Instánsia ne’e tranzitu julgadu ona no reu sira la entrega rai ne’e inisiativa rasik.
“Entaaun tuir lei tenke halo asaun koersiva asaun ida ne’e, obrigatoriamente ema atu kumpri/ entrega imovel ne’e karik husu forsa polísia sira bainhira lakohi entrega ba nia na’in,”Sekretáriu KSMJ Antoninho Gonsalves dehan.
Nia hateten, prosesu ba kazu rai Becuse prosesu ne’ebé ema hotu hatene ho naran prosesu Becuse la’o asaun deklarstiva ho objetivu atu hetan rekonesimentu ba direitu subjetivu ida ba autór no ba iha asaun ne’e, kona-ba direitu propriadade rai tenke halo iha momentu ne’ebé ke adekuandu atu hatoo provas kona-ba faktu sira ne’ebé nia aprezenta.
Maibé durante tempu ne’ebé prosesu lao iha julgalmentu nia laran iha Tribunál sempre fó garantia ba direitu atu defende aan no direitu ba konstraditóriu no mós direitu atu hatoo rekursu sira oin oin ne’ebé lei fó fatin atu halo.
“Lejislatura prosesuál ne’ebé vigór hela halo diferensa entre asaun deklarativa no asaun ezekutiva. Asaun ezekutiva , asaun ida ne’ebé orbriga ema atu kumpri direitu ida ke antes ne’e rekoñese tiha ona liuhosi sentensa ida hosi Tribunál,” Antoninho Gonsalve adianta.
Sekretáriu Konsellu Superiór Majistratura Judisiáriu ne’e, lamenta ho preokupasaun ne’ebé aprezenta hosi públiku ba desizaun Tribunál nia liga ho kazu Becuse hasoru majistratura Judisiál ne’e.
“Konsellu Superiór Majistratura Judisiáriu fó solidaridade tomak ba ema profisionál hotu hotu no funsionáriu publiku sira ne’ebé hola parte iha auto judisiál sira ne’e ho objetivu atu ezekuta sentensa ne’ebé sai hosi Tribunál,” Antoninho Gonsalves konklui.
Jornlista: Natalino Costa
Editór. : Rafael Ximenes de A. Belo
