Membru F-FDTL foun 300 remata kursu atiradór
BAUCAU, 13 abríl 2023 (TATOLI) – Membru foun FALINTIL-FDTL liuhosi Komponente terrestre komposta hosi kompañia rua hamutuk na’in-300 kinta ne’e, remata kursu atiradór espesiál durante fulan-ida resin iha Baucau.
Xefe Estadu Maiór FALINTIL-FDTL, Tenente Jenerál Falur Rate Laek, esplika, kursu refere parte hosi formasaun ba membru foun sira espesiál ba atiradór hanesan navegasaun no asaltu iha área arma lizeira kilat.
“Ohin ita ensera, fó rekoñesementu, atribui sertifikadu no emblema ba sira,” Xefe Estadu Maiór Jenerál F-FDTL, Tenente Jenerál Falur Rate Laek hateten iha Komponente Terrestre Baucau, kinta ne’e.
Nia esplika, normalmente iha militár tenke liuhosi kursu mak bele atribui emblema liuhosi esforsu treinu ho sentidu atu kapasita membru ba profesionál no modernu.
Ho formasaun ne’e sinal dezenvolmemtu tanba iha ona lei estruturante sira hodi hatudu susesu FALINTIL-FDTL hanesan aloka orsamentu ba dezenvolvimemtu kada tinan-lima.
Jenerál fitun tolu ne’e, husu membru sira hotu tenke disiplina, solidáriu ho institusaun seluk no kontinua kuda nasionalizmu iha fuan inklui tenke barani defende Timor-Leste hosi ameasa oinoin iha futuru.
Komandante Komponente Terrestre F-FDTL, Koronél José da Costa Soares ‘Trix’, konsidera kursu atiradór importante molok hatutan tÁn formasaun iha área espesialidade seluk durante sai membru iha institusaun F-FDTL.
“Ba formandu na’in-300 ne’ebé komandu fó ne’e hatudu sinál katak prontu atu kumpre saida mak emblema hatudu katak kilat, atu imi defende imi-nia rai, mean reprezentante eroi sira hotu,” Koronél Trix hateten.
Hosi membru na’in-300, distribui mós sertifikadu ba membru hamutuk na’in-22 ne’ebé hetan prestasaun durante tuir kursu hanesan mellór ho kategoria tolu hanesan instrutór, mellór klasifikadu no mellór klasifikadu kada pelotaun.
Instrutór na’in-10 komposta hosi Maiór Infantaria Nogueira Quintas Laranjina, Tenente Infantaria Cirilio da Conceição, Tenente Infantaria Jaime dos Santos, primeiru sarjentu Infantaria Damião da Silva.
Nune’e mós Primeiru Sarjentu Infantaria Orlando de Jesus, Primeiru Sarjentu Infantaria Paulino Adelaide, Primeiru Cabo, Olderico Perreira, Primeiru Cabo Manuel da Silva, Soldadu Maurício Araújo no soldadu Francisco Alves.
Kategoria daruak mellór klasifikadu komposta hosi membru na’in-rua soldadu, Augosto Ximenes no soldadu, Marciana Tolo.
Kategoria datoluk mellór klasifikadu kada pelotaun hamutuk na’in-10 hosi kompañia rua, komposta hosi soldadu Juvinal Soares, soldadu Feliçiano dos Santos, soldadu Alexandre Silva, soldadu Rivaldo Martins, soldadu Sónio Aparício, soldadu Abrão Gonçalves, Soldadu João Conceição, soldadu Eugevio Coa, soldadu Aguido Santos no soldadu Fidel Fernandes.
Formasaun refere hahú abertua iha loron-6 fulan-marsu no ensera iha loron-13 abríl, ne’ebé partisipa hosi Xefe Estadu Maiór Jenerál F-FDTL, Tenente Jenerál Falur Rate Laek, Komandante Komponente Terrestre, Koronél Trix, autoridade munisípiu tolu, konsellu veteranu inklui reprezentante PNTL munisípiu Baucau, Viqueque no Lospalos.
Jornalista : Natalino Belo
Editór : Evaristo Soares Martins
