COVALIMA, 13 abríl 2023 (TATOLI)–Membru Grupu Arte Marsiál (GAM) KORK tuda kanek Evangelina Lopes to’o suku suku pontu rua, estraga uma-ida no foti komunidade nia kombustível iha bairru Raifila, postu administrativu Zumalai, munisípiu Covalima.
“Ami tu’ur iha ami-nia uma, membru KORK la’o hodi lori motorizada hafoin hasoru joven sira iha bairru Raifila, tun kaer liman tanba de’it joven balun ko’alia maun-alin la’o iha bairru laran labele gas motorizada tanba labarik kiik toba. Hafoin ne’e, mosu dezentedementu hodi tuda estraga uma ida no tuda kanek ha’u-nia banin Evangelina Lopes nia-ain suku ho pontu rua,” Xefe Aldeia Ritiluli, sku Lour, postu Zumalai, Romea Barreto, hateten ba jornalista iha bairru Raifila, kinta ne’e.
Kazu ne’e akontese iha bairru Raifila maizumenus tuku 14h00 lorokraik iha 10 abríl tinan 2023 bainhira membru organizaun KORK hala’o viajen ho kaereta 12 ho motorizada 100 atu ba Aianro hodi hala’o sakrifisiu iha munisípiu refere.
Molok vitima Romea Barreto hato’o keixa ba eskuadra PNTL postu administrativu Zumalai, membru KORK ameasa ho tudik atu sona Romea Barreto msibé nia la tauk no konsege hato’o keixa ba eskuadra PNTL Zumalai.
Hafoin hato’o keixa, vítima rasik lori nia banin Evangelina Lopes hakat ba fasilidade saúde atu halo tratamentu ba vítima nia ain kanek ne’ebé pesoál saúde sira konsege suku ho pontu rua.
Vítima Evangelina Lopes haktuir, membru Organizasaun KORK hala’o problema ho joven-sira iha uma sorin hafoin sira halai mai tuda estraga uma ne’ebé konstrui hela.
“Membru KORK tuda ha’u nia uma, ha’u dehan ba sira tanba sa imi tuda no estraga ha’u nia uma , hafoin ha’u ko’alia seidauk hotu fatuk kona ha’u nia ain ran ha’u lori ha’u nia bei-oan lori ba uma laran sira tuda fatuk kona ha’u nia ain kanek “ Vítima dehan
Vítima Evangelina Lopes la hatete membru KORK sira-ne’e mai husi ne’ebé la hatene tanba membru KORK la’o ho ekipa vítima sira tuur iha sira-nia uma.
“Membru KORK sira-ne’e mai hosi ne’ebé, nia parte lahatene tanba sira la’o ekipa. Ami tuur iha ami-nia uma laran, bainhira sira tun naran tuda uma mak ami hakfodak,” nia hateten.
Komandante PNTL Munisípiu Covalima, Superintendente Polísia Basílio de Jesus klarifika, iha área Fatukahu mosu situasaun kiik ne’ebé asaun la grave, momentu hanesan ne’e normál tanba polísia nia prezensa atu atua, nune’e ba futuru labele akontese tan.
“Iha tuku 12h00 lorokraik, ita-nia joven hosi organizasaun KORK hosi Bobonaro liuhosi Zumalai, liuhosi Fatukahu akontese problema kiik-oan ida entre joven-sira iha estrada ibun, hodi haree sira-nia movimentu hamosu asaun kiik joven hosi Bobonaro responde asaun balun, ne’ebé rezulta didin-kalen tahan rua tolu aat, laiha buat seluk ne’ebé grave,” nia informa.
Hafoin ne’e, nia parte orienta kedas eskuadra PNTL Zumalai tun ba terrenu hodi haree joven halo asaun liu-ona no konsege foti evidénsia baku balun, tuda didin uma nia nakbetok, ferik ida hetan kanek uitoan maibé la grave.
“Ha’u orienta kedas eskuadra PNTL Zumalai tun ba lokasi, sira halo asaun ho karreta liu iha fatin ne’e. Ita konsege foti evidénsia balun hanesan balu-balun baku filan didin kioske, kabetak ferik ida hetan mós kanek kiik no kondisaun la grave,” nia hateten.
Eskuadra PNTL to’o iha fatin, joven sira hala’o asaun liu ona ba Ainaro no nia parte mós la konsege kontaktu ba lidér másimu KORK, tanba laiha númeru telefone, maibé nia kontaktu de’it ba komandante PNTL munisípiu Ainaro bainhira partisipa iha serimónia sa’e sintu hodi hato’o mensajen.
Jornalista : Celestina Teles
Editór : Cancio Ximenes
