STAE Viqueque fó formasaun ba brigadista na’in-112
VIQUEQUE, 13 abríl 2023 (TATOLI)— Sekretáriadu Tékniku Administrasaun Eleitorál (STAE), munisípiu Viqueque, hahú oferese formasaun ba brigadista na’in-112 sira kona-ba aktu eleitorál ba eleisaun parlamentár ne’ebé sei akontese iha 21 maiu 2023.
Formasaun ba brigadista STAE durante loron tolu, ne’ebé foka-liu matéria kona-ba prosesu atendimentu iha sentru votasaun no aktu eleitorál sira iha eleisaun parlamentar 2023.
“STAE sei hatudu ita-nia disipliña no responsabilidade atu hetan rezultadu ne’ebé di’ak iha prosesu votasaun no sura-votu nomós fó satisfasaun ba ita hotu kona-ba lala’ok prosesu demokrásia ida-ne’e”, Diretór STAE Munisípiu Viqueque, Humberto Fernandes, hateten liuhusi ninia diskursu abertura formasaun ba brigadista sira, iha salaun administrasaun Viqueque, kuarta (12/04).
Nune’e, Diretór STAE ne’e husu ba brigadista hirak ne’e tenke sai motivador hodi motiva eleitór sira hodi partisipa másimu iha eleisaun parlamentar 2023 nian.
Iha fatin hanesan, Administradór Munisípiu Viqueque, Januario Soares “Bolly”, hateten prosesu eleisaun kada períodu atu la’o diak no susesu iha responsabilidade brigada STAE sira nia liman.
“Maske, sira mai husi kór partidu polítiku oi-oin, maibé asume kna’ar tenke ho resposabilidade atu asegura estabilidade iha eleisaun. Atu votante sira deside tuir direitu nu’udar reprezentante iha Governu ka Estado RDTL. Ho nune’e ha’u husu ba brigada sira tenke servisu ho independente, profisionál ho responsabilidade, liuliu atu fó susesu ba prosesu eleisaun parlamentar tinan ida-ne’e”, Administradór ne’e apela.
Formasaun ne’e hahú kuartu sei ramata formasaun ba brigadista sira sesta aban no hetan partisipa husi birgada na’in-112 STAE Viqueque.
Iha serimónia abertura formasaun ba brigada sira ne’e hetan partisipa husi diretór Komisaun Nasionál Eleisaun (CNE-sigla portugués) munisípiu Viqueque no funsionariu STAE Viqueque.
Jornalista :Vitorino Lopes da Costa
Editór :Florencio Miranda Ximenes
