Xefe suku Suai Loro husu MOP hadi’a infraestrutura bázika
COVALIMA, 13 abríl 2023 (TATOLI)–Xefe suku Suai Loro, Martinho Mendonça, husu ba Ministériu Obra Públika hadi’a infraestrutura bázika hanesan Estrada, dada bee-moos no instala eletrisidade iha fatin turizmu komunitária, nune’e bele fasilita sidadaun sira bainhira vizita turizmu komunitária iha tempu kalan.
“Ha’u husu ba Ministériu Obra Públika (MOP) atu instala eletrisidade dada bee-moos no ateru Estrada, nune’e fasilita vizitante sira atu vizita turizmu iha tempu kalan ho naroman,” Xefe suku Suai Loro hato’o iha nia diskursu iha serimónia inaugura projetu Turizmu Komunitária iha suku Suai Loro, kinta ne’e.
Razaun lideransa komunitária husu ba Governu atu instala ahi tanba iha tempu kalan turizmu komunitária iha Suai Loro bainhira tempu kalan nakukun, nune’e iha tempu kalan vizitante sira labele halo vizita ba fatin turizmu komunitária.
Aleinde dada ahi, presiza mós dada bee-moos tanba bee hanesan nesesidade bázika atu uza loro-loron hanesan iha fatin turizmu konstrui ona sintina públika, maibé bee-moos laiha ida-ne’e defisil tebes atu uza sintina públiku no presiza mós ateru estrada.
Ministru Obra Públika (MOP), Abel Pires da Silva, hateten simu rekomendasaun hosi xefe, nia parte orienta kedas ba xefe unidade EDTL-EP Covalima atu halo survei hodi halo instalasaun ba liña elietrisidade.
Aleinde instala eletridade, nia mós promete atu koordena no koordenadór BTL, E.P Covalima atu dada bee-moos ba fatin turizmu komunitária iha suku Suai Loro, maibé kona-ba estrada nia la promete.
Entertantu, Governu apoiu fundu hodi kria fatin turizmu komunitária ho orsamentu hamutuk $45.000-resin ne’ebé iha fatin refere konstrui gazebo 16, palku bem vindo, sintina públiku no seluk tan.
Jornalista : Celestina Teles
Editór : Cancio Ximenes
