iklan

ATAÚRO, ELEISAUN, HEADLINE

Eleitór 4.023 iha Ataúro muda ona kartaun eleitorál ba munisípiu

Eleitór 4.023 iha Ataúro muda ona kartaun eleitorál ba munisípiu

Diretór Sekretariadu Tékniku Administrasaun (STAE) munisípiu Ataúro, Eliapa da Costa.Imajen/Espesial.

DILI, 14 abríl 2023 (TATOLI)Diretór Sekretariadu Tékniku Administrasaun (STAE) munisípiu Ataúro, Eliapa da Costa, relata eleitór hamutuk 4.023 maka tuir ona prosesu resensiamentu eleitorál hodi muda eleitorál hosi postu administrativu Dili nian ba munisípiu Ataúro.

Sidadaun ne’ebé muda ona eleitorál hosi postu ba munisípiu Ataúro to’o iha fulan-marsu tinan ne’e hamutuk 4.023, mane 2.044 no feto hamutuk 1.979. Hosi númeru ne’e, nia dehan inklui mós ho eleitór ne’ebé atinje ona idade 17 ka eleitór foun,” nia dehan ba Tatoli, via telefónika, ohin.

Hosi totál eleitór ne’e, hosi Suku Beloi hamutuk ema 725 kompostu hosi mane 354 no feto 370, Suku Biqueli 1.263 kompostu hosi mane 633 no feto 630, Suku Makadade 591 kompostu hosi mane 308 no feto 283, Suku Maquili 889 kompostu hosi mane 463 no feto 426, Suku Vila Maumeta 556 kompostu hosi mane 286 no feto 270.

Enkuantu, populasaun ne’ebé seida’uk atualiza hodi muda kartaun eleitorál hosi postu Administrativu ba munisípiu hamutuk 3.778. Tanba antes ne’e Ataúro nu’udar postu administrativu ida hosi munisípiu Dili nian, maibé agora daudaun Ataúro estabelesidu nu’udar munisípiu.

“Ida-ne’e ami halo atendementu hela hodi halo expozisaun ka taka lista naran iha sede suku nune’e eleitór ida-idak ba konfirma nia naran, karik identidade moris mak lahanesan ho dokumentu bele konfirma no lori ba STAE munisípiu nune’e imprime fali,” nia hateten.

Nia esplika lista expozisaun ne’e hahú ona iha 6 fulan-abríl no sei remata iha 16 abríl tinan ne’e. Depois loron 15 antes eleisaun, STAE sei fó tan tempu ba eleitór atu atualiza ninia kartaun hahú iha 22 abríl to’o 6 maiu.

“Ida-ne’e segunda via ba atualizasaun baze dadus ba ikus nian molok ita tama ba eleisaun ne’e,” Eliapa dehan.

Munisípiu Ataúro iha brigada hamutuk 15 no ofisiál eleitorál 200.  Nune’e mós iha Sentru votasaun hamutuk 15 no estasaun votasaun hamutuk 20.

“Bazeia ba ida-ne’e ami hahú ona fó formasaun ligadu ho edukasaun votante ba eleitór foun sira atu oinsá mak bele asesu ba iha eleisaun lejizlativa. Formasaun ne’e hahú ona iha 12 to’o 14 abríl nune’e brigada sira kontinua kedas halo edukasaun votante ba eleitór sira iha territóriu Ataúro,” nia hateten.

Jornalista: Osória Marques

Editór  : Agapito dos Santos

iklan
iklan

Leave a Reply

iklan
error: Content is protected !!