OÉ-CUSSE 14 abríl 2023 (TATOLI) – Sub-Komisaun Reguladora Arte Marsiál (Sub-KRAM), Rejiaun Administrativa Espesiál Oé-Cusse Ambeno (RAEOA), fó sai ona sirkulár ba organizasaun arte-masiál sira iha Oé-Cusse, hodi suspende provizória atividade ezersísiu arte nian durante períodu kampañia eleitorál to’o loron eleisaun.
Notísia relevante: RAEOA realiza kampaña nasionál palku dame hodi prevene konflitu
Prezidente sub-KRAM Oé-Cusse, Zeferino da Cruz Salu, hatete, razaun suspende atu hamutuk prepara partisipa iha kampaña eleitorál hodi kontribui pás-estabilidade iha prosesu festa demokrasia ne’e.
“Iha semana kotuk, sub-KRAM sirkula ona hanesan avizu ba organizasaun hotu-hotu arte-marsiál Oé-Cusse, hanesan orden proibisaun atu ita-bele koopera hamutuk ba estabilidade pás iha prosesu festa demokrasia, katak atividade organizasaun hotu treinamentu (ezersísiu) no buat seluk ita sei suspende provizóriu,” Zeferino da Cruz Salu, ko’alia iha ámbitu kampaña nasionál palku dame, iha salaun igreja Numbei, Oé-Cusse, sesta ne’e.
Notísia relevante: KRAM Oé-Cusse sei mobiliza GAM halo asaun dame molok treina livre
Prezidente sub-KRAM ne’e konfirma, ba uniforme inklui atributu organizasaun, sub-KRAM la- autoriza atu uza durante iha kampaña eleitorál, só depois eleisaun liutiha mak fó sai aviza liuhosi sirkulár ida atu reativa fali treina livre.
“Ha’u hanoin koordenadór organizasaun sira, iha ona koñesimentu tanba sirkulár entrega ona iha kada organizasaun inklui nia baze legál entrega ona iha komandu PNTL Oé-Cusse, no Prezidente Autoridade no mós ba KRAM nasionál,” nia katak.
Responsável ne’e fó hanoin ba grupu arte-marsiál sira, atu iha koñesimentu kona-bá papél Estadu no Governu no sekuénsia ba lei arte-marsiál nu’udar xave atu promove dame no solidariedade iha sosiedade nia leet.
“Presiza hatene buat rua, primeiru papél Estadu no Governu, segundu maka sekuénsia lei arte- marsiál nian, tanba ne’e maka ita bele ko’alia ba pás, estabilidade, trankuilidade ármonia sosiál ba ita-nia nasaun, liuliu iha Oé-Cusse,” nia fó hanoin.
Prezidente sub-KRAM Oé-Cusse, orgullu, tanba konjuntura organizasaun ne’ebé eziste iha Oé-Cusse hamutuk hitu, ho kompozisaun envolve membru kuaze 2000 bazea dadus KRAM iha 2021, maibé seidauk iha lista problema kona-ba problema arte-marasiál.
Purtantu, iha 26 abríl 2022 ne’e Governu liuhosi Sekretária Estadu Juventude no Desportu (SEJD), aprova ona legalidade ba arte marsiál tolu, IKS, PSHT no KORK no publika ona iha jornál repúblika hodi bele halo treinu livre no sa’e sintu iha rai laran.
Bazea rezolusaun Governu númeru 14/2020, 02 marsu, ne’ebé revoga tiha rezolusaun númeru 16/2013 hodi fó informasaun ba grupu arte-marsiál tolu ne’e, presiza kumpre kritériu ne’ebé rejista hamutuk pontu 18.
Entretantu, tuir dadus ne’ebé sub-KRAM Oé-Cusse rejista, hamutuk organizasaun hitu (7) maka eziste iha Oé-Cusse ho totál membru hamutuk 1.800-resin, komposta hosi Organizasaun Persaudaraan Setia Hati Terate (PSHT), organizasaun Ikatan Kera Sakti (IKS), organizasaun Kmanek Oan Rai-klaran (KORKA), organizasaun Perisai Diri (PD), THS-THM, Karate, Boxin, no Taekwondo.
Notísia relevante: GAM iha Oé-Cusse sempre promove dame iha sosiedade
Jornalista : Abílio Elo Nini
Editór : Evaristo Soares Martins
