MOP sosializa estudu dezenvolvimentu dezignada iha Baucau
BAUCAU, 14 abríl 2023 (TATOLI) – Ministeriu Obra Públika (MOP) liuhosi diresaun jerál abitasaun no urbana, sesta ne’e sosializa rezultadu projetu estudu viabilidade zona dezenvolvimentu dezignada iha Baucau.
Diretór Nasionál Urbanizmu MOP, Manuel da Costa Xavier, esplika, objetivu hosi atividade refere atu informa rezultadu estudu viabilidade ba komunidade sira tanba hanesan mapeamentu ida hodi sai matadalan ba governu atu halo investimentu iha futuru.
“Rezultadu estudu faze dahuluk iha vantajen tanba konsege hetan rai ektare atus rua hosi suku Bahu no Caibada, neebe sei halo zona abilitasaun, zona ba edifísiu no seluk tán iha faze tuir mai,” Diretór Nasionál Urbanizmu hateten Vila Antiga, sesta ne’e.
Rezultadu estudu bazea ba geografikamentu hatudu munisípiu Baucau, iha postu administrativu Baucau Vila konsege identifika suku rua hanesan Bahú no Caibada sei sai zona indústria hanesan abitasaun, edifísiu no desportu ho total rai ektare 200.
Estudu viabilidade refere identifika munisípiu Baucau sai poténsia ba indústria tanba Baucau nu’udar fatin agrikultura, fatin turismu inklui natar ne’ebé iha poténsia boot.
“Área rua ne’e mak ba futuru sai sentru indústria maibé atu sai zona indústria iha faze preparasaun, presiza tempu tinan-lima no sei kompleta ho durasaun tinan-15,” Manuel da Costa Xavier akresenta.
Liuhosi prosesu identifikasaun ekipa tékniku sira rejista poténsia sira-ne’ebé iha suku rua refere maibé sei aprezenta fila-fali rezultadu poténsia hirak ne’e ba autoridade lokál no komunidade nune’e bele halo kompleta bainhira iha poténsia balun seidauk ajusta tuir estudu viabilidade refere.
Planu projeitu refere bainhira susesu iha futuru preszja kontribuisaun no kolaborasaun hosi komunidade no autoridade lokál sira hodi apoia ekipa tékniku sira bainhira iha faze implementasaun.
Xefe suku Bahú, Manuel Francisco Rodrigues Gusmão, hatete, hanesan autoridade hamutuk ho komunidade prontu koopera no simu ekipa tékniku hodi kontinua prosesu tuir mai.
“Ita presiza dezenvolvimentu entaun presiza fó kontribuisaun hosi ita-nia esforsu hamutuk ho komunidade, oinsá ita-nia tékniku sira hosi nasionál, munisípiu no postu tún mai halo dezenvolvimentu, labele akontese buat ruma no ami hosi suku prontu apoiu laiha rezerva,” Xefe suku Bahu hateten.
Projetu estudu viabilidade ba zona dezenvolvimentu dezignada hala’o iha munisípiu rua hanesan Baucau, postu Baucau vila iha suku Bahú ho Caibada. Enkuantu iha munisípiu Bobonaro hala’o iha área Batugade.
Jornalista : Natalino Belo
Editór : Evaristo Soares Martins
