Operadór Telekomunikasaun Telemor monta ona torre unidade 14
DILI, 14 abril 2023 (TATOLI)—Operadór Telekomunikasaun Telemor hosi nasaun Vietname ne’ebé hari’i iha Timor-Leste hahú 2012, agora daudaun monta ona torre unidade 14 iha territóriu laran tomak inklui Rejiaun Administrativa Espesiál Oé-Cusse Ambeno (RAEOA).
Informasaun ne’e fo sai hosi Empreza Telemor, hafoin Ajénsia Promosaun Investimentu no Esportasaun, Institutu Públika (TradeInvest Timor-Leste) liuhosi Diresaun Promosaun Investimentu (DPI), hala’o vizita traballu ba Empreza Telemor iha RAEOA no Zona Espesiál Ekonómia, Sosiál Merkadu (ZEESM), iha loron (13/04).
“Empreza Telemor rasik instala ona torre unidade 14. Hosi torre ne’e rasik torre 12 mak uja ona rede 4G no hela torre rua mak sei uza rede 3G,” Diretór DPI, Ezaquiel da Costa Babo, hateten, liuhosi nota komunikadu ne’ebé Agência Tatoli asesu, sesta ne’e.
Objetivu prinsipál TradeInvest hala’o vizita traballu iha RAEOA ne’e atu haree no observa direita progresu no dezafiu investimentu iha área telekomunikasaun iha RAEOA no ZEESM.
Tanba empreza Telemor hanesan benefisiáriu ba sertifikadu investimentu ne’ebé atribui hosi Governu Timor-Leste iha loron 19 setembru 2012.
Antes ne’e, Diretór Jerál Telemor, Tran Van Bang, hateten, Telemor sei halo promosaun hodi mellora kualidade infraestrutura rede nian iha fulan sira oin mai hodi mellora hodi atende públiku.
“Simultaneamente prepara ba koneksaun broadband no prestaun servisu ba rede 5G,”nia dehan.
Telemor rasik, hosi empreza Vientame Group, ne’ebé grupu indústria telekomunikasaun iha Vietname ne’ebé hatudu ona susesu investe iha nasaun 11 kontinente tolu inklui Timor-Leste.
Jornalista : Arminda Fonseca
Editora : Armandina Moniz
