Aban, CNE Oé-Cusse dezloka ofisiál ba suku 18 superviziona atividade eleitorál
OÉ-CUSSE 17 abríl 2023 (TATOLI) – Diretór Komisaun Nasionál Eleisaun (CNE, sigla portugés), Rejiaun Administrativa Espesiál Oé-Cusse Ambeno (RAEOA), Tomás Oqui Meta, informa, iha loron tersa ne’e sei dezloka ona ofisiál supervizaun sira iha suku 18 pertense ba sub-rejiaun haat iha territóriu Oé-Cusse hodi observa atividade konsolidasaun no kampaña eleitorál to’o loron eleisaun.
Notísia relvante: Ofisiál supervizaun CNE na’in-115 hahú hala’o serbisu iha Oé-Cusse
“Preparasaun ba kampaña no eleisaun, agora ita-nia ofisiál sira na’in-115 durante ativa ona iha edifísiu CNE Oé-Cusse hodi hala’o kna’ar hanesan edukasaun sívika ba suku no aldeia sira, ne’ebé komesa aban loron tersa, ita dezloka ona sira ba suku atu servisu hamutuk ho ekipa hosi STAE no autoridade kompatente sira, hanesan xefe suku no Ofisiál Polísia Suku (OPS) atu superviziona lala’ok kampaña no mós eleisaun nian iha baze,” Tomás Oqui Meta, informa ba Tatoli iha Oé-Cusse, segunda ne’e.
Tuir nia, ofisiál supervizaun iha Oé-Cusse hamutuk na’in-115, sira-ne’ebé destaka iha suku pertense ba sub-rejiaun tolu, Oésilo, Pássabe no Nítibe, inklui Pante Makasar balu, hanesan suku Taiboko, Naimeko, Bobokase no Lifau.
“Ita destaka sira iha suku hahú hosi kampaña to’o loron eleisaun, hafoin remata kontajen iha sentru votasaun mak sira sei tún mai,” nia afirma.
Maibé hosi suku haat seluk, hanesan Cunha, Lalisuk, Costa no Nípani, sei ativa iha edifísiu, tanba distánsia besik no mós atu hala’o servisu balu, no prepara sira atu suporta suku balu, karik iha partidu rua to’o tolu hala’o kampaña ajenda hanesan iha suku ida, entaun sira bele apoia malu.
“Tanba antes ita koloka sira ba iha baze, sira hetan ona formasaun, no formasaun ne’e mós fasilita hosi nasionál, entaun agora ita bele koloka ona sira iha suku no sub-rejiaun sira atu halo monitorizasaun ba atividade eleitorál,” nia tenik.
Tuir dadus Sekretariadu Tékniku Administrasaun Eleitorál (STAE) rejista, sentru votasaun 80 no estasaun votasaun 115 maka estabelese iha territóriu Oé-Cusse, ho totál eleitór provizória hamutuk 53.153, komposta hosi mane 27.407 no feto 26.106.
Notísia relevante: Ofisiál supervizaun eleitorál 117 hahú tuir formasaun iha Oé-Cusse
Jornalista : Abílio Elo Nini
Editór : Evaristo Soares Martins
