CCI-TL realiza festivál kulturál selebra loron moris munisípiu Baucau
BAUCAU, 17 abríl 2023 (TATOLI) – Kámara Komérsiu Indústria Timor-Leste (CICI-TL, sigla portugés) munisípiu Baucau realiza eventu festival kulturál hodi komemora loron moris ezisténsia munisipál Baucau ba tinan 164.
Prezidente CCI-TL munisípiu Baucau, José Januário dos Reis ‘Noki’, esplika, loron moris munisípiu Baucau iha loron-20 fulan-abríl tinan 1859 nune’e inísia hosi asosiasaun otelária Baucau nune’e CCI Baucau sai organizadora hodi komemora loron moris munisípiu Baucau ne’ebé festivál refere sei ensera iha loron kinta, 24 fulan-abríl.
“Ita-nia inisiativa hodi realiza festivál ne’e simu ho reasaun pozitivu hosi partisipasaun no kontribuisaun emprezáriu nível kiik to’o boot, ne’e importante tanba atu konsensializa Baucau oan sira katak moris iha rai iha nia hún ho istória rasik,” Prezidente CCI-TL Baucau hateten iha Vila Antiga, segunda ne’e.
CCI-TL Baucau husu komunidade Baucau oan atu mobiliza no motiva hodi partisipa iha eventu festivál kultura refere nune’e futuru bele kontribui ba setór ekonomia rai-laran.
CCI-TL tuir planu sei mellora di’ak liután eventu hanesan iha futuru nune’e sai kustume tanba inísiu hahú ona no prontu kolorabora ho setór publiku sira, liuliu autoridade munisipál Baucau.
“Atu hadi’a sei labele akontese kuandu la hahú tanba ne’e hahú lai mak foin hadi’a,” Noki akresenta.
Objetivu polítika iha festival kulturál refere iha futuru sai nu’udar eventu tradisaun ne’ebé tenke iha desizaun hosi autoridade munisipál hodi defini loron feriadu ba munisípiu Baucau iha loron-20 fulan-abríl nune’e bele komemora loron moris Baucau.
Sekretáriu Munisipál Baucau, Simão dos Santos Marques Pinheiro, hateten, maske autoridade administrasaun munisipál Baucau laiha osan tanba la prevee iha planu asaun anuál maibé sei halo planu iha orsamentu jerál estadu nune’e bele kontribui ba eventu refere iha tinan-2024 mai.
“Eventu sira hanesan ne’e ita promove buat lubuk ida hodi reforsa ekonomia Baucau,” Simão Pinheiro hateten.
Autoridade Baucau hato’o apresiasaun ho inisiativa hosi CCI-TL Baucau ne’ebé organiza ona festivál kulturál hodi selebra loron importante refere nune’e autoridade Baucau kompromete sei legaliza loron-20 abríl nu’udar loron moris munisípiu Baucau iha tempu besik.
Eventu refere hahú ho karavana hosi edifísiu administrasaun Baucau, Vila Antiga no remata iha Sentru Konvensaun Baucau (CCB, sigla portugés), kontinua kedas ho serimónia abertura no tuir planu sei aprezenta espozisaun kulturál hosi postu administrativu neen, kompetisaun dansa kulturál, tebe-tebe, kulinária, fashion kulturál, animasaun banda lokál, jogu tradisionál futu-manu ne’ebé sei remata iha loron-24 abríl.
Jornalista : Natalino Belo
Editór : Evaristo Soares Martins
