DILI, 17 abríl 2023 (TATOLI)–Funsionáriu Ministériu Transporte no Komunikasaun (MTK) hamutuk na’in-50 simu pose hodi trata asuntu grupu traballu no inkluzaun iha ministériu.
Iha biban ne’e, Ministru Transporte no Komunikasaun, José Agustinho da Silva, felisita no husu emposadu sira bele hala’o knaar ho responsabilidade.
“Ha’u hato’o parabéns ba grupu traballu jéneru no inkluzaun sosiál ne’ebé foin simu pose. Ita hotu hein hodi kontinua luta nafatin ba igualdade jéneru no inkluzaun sosiál iha ministériu ne’e,” José Agustinho hateten iha ámbitu seremónia pose, iha salaun MTK Caicoli, segunda ne’e.
Nia relata, MTK daudaun ne’e iha funsionáriu ida reprezenta ema ho difisiénsia hodi fó atendimentu ba públiku. Liga ho dezenvolvimentu infraestrutura sira ne’ebé durante ne’e iha hela planu, liuliu infraestrutura aeroportu no terminál sira sei tau importánsia ba ema ho difisiente bele utiliza espasu públiku.
Notísia relevante: SEII promove igualdade no inkluzaun iha grupu traballu interministeriál
Aleinde ne’e, MTK fó atensaun sériu ba polítika Governu, liuliu akomoda nesesidade ema ho difisiénsia inklui labarik feto no feto sira bainhira asesu ba transporte públiku.
“Ida-ne’e ita sei tau atensaun másimu hodi envolve planu akomoda halo atendimentu dignu ba ema ho difisiénsia. Faktu ida maka fasilidade iha ró-ahi Berlin Ramelau iha ekipamentu hodi halo atendimentu ba ema ho difisiénsia inklui inan-feton ho kondisaun isin-rua,” nia akresenta.
Iha biban hanesan, Sekretária Estadu Igualdade no Inkluzaun, Maria do Rosário Fátima Correia, apresia ho vontade MTK ne’ebé mak tau importánsia ba asuntu igualdade jéneru no inkluzaun iha ministériu laran.
“Ha’u apresia tebes Ministériu Transporte no Komunikasaun ne’ebé iha inisiativa bele implementa asuntu igualdade no inkluzaun tanba iha tinan 2018 Ministériu Finansa konsidera ona markadór jéneru iha sistema finansa ‘Dalan ba Futuru’, nonmós iha ona dekretu-lei númeru 37/2017 kona-ba estabelesimentu grupu traballu jéneru entre liña ministeriál,” Maria do Rosário dehan.
Nia salienta, VIII Governu nia kompromisu katak ema mak sai sentru ba dezenvolvimentu, tanba ne’e maka ministériu hotu tau importánsia ba ema ho difisiente tanba maski ho difisiente matan, tilun no ain maibé iha kapasidade intelektuál atu ezerse knaar iha instituisaun Estadu.
“Emposadu sira iha responsabilidade tomak ba asuntu igualdade no inkluzaun tanba asuntu ne’e sai mós área estratejia ida,” governante ne’e afirma.
Jornalista : Antónia Gusmão
Editora : Julia Chatarina
