DILI, 17 abríl 2023 (TATOLI)—Prezidente Repúblika (PR), José Ramos Horta, husu Sekretariadu Tékniku Administrasaun Eleitorál (STAE) atu kria kondisaun ba jornalista sira hosi mídia privadu sira vota livre iha fatin sentru votasaun bainhira halo kobertura ba iha eleisaun parlamentár 2023.
“Ne’e labele, diskriminasaun, tanba ita hakarak hotu-hotu partisipa kria kondisaun para jornalista sira hotu-hotu bele vota. Se lae, ha’u la konkorda ida-ne’e STAE laiha kompeténsia halo desizaun ida-ne’e,” PR Horta hateten ba jornalista sira iha edifísiu MNEK, Avenida Portugál, segunda ne’e.
PR preokupa ho STAE ne’ebé fó sai hodi autoriza de’it mídia estatál mak vota livre iha sentru votasaun ne’ebé halo atividade jornalístika ka kobertura ba.
“Lae, entaun signifika tinan sira lubuk ida ba kotuk, STAE kria kondisaun jornalista sira-ne’ebé-ne’ebé vota, entaun sira haree sentru paralelu, uluk halo tiha ona tuir lei anterior,” nia hateten.
Jornalista : Nelson de Sousa
Editór : Cancio Ximenes
