DILI, 17 abríl 2023 (TATOLI)—Membru Parlamentu Nasionál (PN) kontinua husu ba Ministéiru Obra Públika (MOP) ho Institutu Jestaun Ekipamentu (IJE) atu normaliza Estrada liga ba sentru votasaun iha eleisaun parlamentár.
“Agora ita atu tama ona ba iha faze kampaña nian, loron rua tan no ita haree kuaze iha munisípiu sira iha suku no aldeia sira-ne’ebé agora daudaun prepara fatin sentru votasaun sira to’o agora dalan seidauk di’ak nafatin de’it. Pelumenus halo óinsá loke netik dalan ruma hodi nune’e kareta bele lori urna sira iha ne’eba ho ita-nia seguransa sira, nune’e eleisaun ne’e bele la’o di’ak,” Deputadu CNRT, Domingos Carvalho, levanta liuhosi reuniaun plenária PN, segunda ne’e.
Nia rekomenda sidadaun Timor iha direitu tenke ezerse direitu votu ne’e ba partidu ne’ebé de’it, ne’e demokrásia maibé atu la vota ne’e labele tanba agora daudaun haree ema hosi foho agora barak liu hela iha Dili, no to’o loron óinsá sira bele dezloka ba hotu munisípiu hodi tuir votasaun.
“Entaun Governu tenke kria transporte ruma hodi mobiliza ema kada munisípiu ida-idak nune’e sira fila tuir votasaun,” nia rekomenda.
Deputada KHUNTO, Irene Gonzaga, hateten la kle’ur tan hela loron rua ita tama ona ba tempu kampaña estrada Welolo-Viqueque grave tebes motor no karreta de’it labele liu entaun husu MOP atu tau brigada ida atu normaliza Estrada hodi fasilit movimentasaun transporte.
Deputada CNRT, Maria Barreto, hateten estrada sira-ne’ebé liga entre munisípiu ba postu no suku kuaze aat no kotu, tempu kampaña besik ona nune’e presiza hetan normalizasaun lalais hosi parte konpetente.
Deputadu KHUNTO, António Verdiál, mós husu atu hadi’a Ministéiru Obra Públika no Institutu Jestaun Ekipamentu atu tau atensaun ba kondisaun estrada hodi normaliza.
“Ha’u foti ezemplu simples bainhira semana kotuk ha’u fila hosi Lolotoe presiza tebes Governu nia atensaun ba dalan ne’eba. Ida fali dalan ba Suai dalan bee mea ponte ne’e na’in tohar de’it, agora ita-nia viajen labele liuhosi ne’eba. Atu ba Suai karik ita tenke liuhosi Alto Lebos ba fali Lotoer ba Maukatar ne’e mós dalan perígu tebes,” nia dehan.
Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, dehan atividade saida de’it mak ko’alia kona-ba estrada, infraestrutura, ponte hanoin ministru MOP fó sai ona iha públiku hosi mídia.
Iha semana kotuk katak antes eleisaun 21 maiu estrada ne’ebé liga sentru votasaun no fatin sira ne’ebé prinsipál hodi lojístika ba eleisaun nian sei hadi’a hotu hodi fasilita serbisu STAE no komunidade nian atu hola parte eleisaun ne’e rasik.
Jornalista : Nelson de Sousa
Editór : Cancio Ximenes
