Trimestre dahuluk: Floresta Covalima kontribui reseita $1,850 ba kofre Estadu
COVALIMA, 17 abríl 2023 (TATOLI)–Xefe Departamentu Reprezentasaun Territoriál Floresta Planta Indústria Covalima, Francisco Sarmento, hateten hahú fulan-janeiru to’o marsu tinan ne’e, floresta Covalima kontribui ona reseita $1,850 ba kofre Estadu.
“Tuir dadus ne’ebé ami iha, iha trimestre dahuluk hahú fulan-janeiru to’o fulan marsu tinan ne’e, Floresta Covalima kontribui ona reseita $1,850 ba kofre Estadu,” Xefe Departamentu Reprezentasaun Territoriál Floresta Planta Indústria Covalima, Francisco Sarmento, informa ba Agência Tatoli, iha-nia kna’ar fatin, Kampung Baru, segunda ne’e.
Floresta Covalima kontribui reseita ne’e mai hosi sidadaun ne’ebé koa ai halo negósiu hodi transporta ai hosi Covalima ba Díli tipu ai indústria hanesan ai-teka ne’ebé hahú fulan janeiru-to’o marsu ho totál volume ai hamutuk 74 metru kúbliku.
Lisensa uza sosiál hahú fulan-janeiru to’o marsu volume ai 419,45 metru kúbiku ne’ebé ho tipu ai-sira hanesan aiteka, ai gemila, kafira, ai-ru, we karui, kakeu, lelefuik, roti no ai mame.
Tipu lisensa sosiál ne’e, sidadaun-sira koa-ai iha sira-nia toos rasik atu sustenta família laran, halo uma hela fatin no halo uma adat.
Ho nune’e, nia dehan, durante trimestre dahuluk floresta Covalima konstribui de’it reseita $1,850 ba kofre Estadu, tanba maioria tipu lisensa sosiál mak barak tanba lisensa ba negósiu uitoan de’it.
Tipu lisensa sosiál barak tanba iha fulanp-janeiru ne’e, volume ai 78,22 metru kúbiku, fevereiru volume ai 205,2 metru kúbliku no marsu volume ai 136,03 metru kúbiku.
Jornalista : Celestina Teles
Editór : Cancio Ximenes
