DILI, 18 abríl 2023 (TATOLI) – Diretór-Ezekutivu Fundu Dezenvolvimentu Kapitál Umanu (FDCH, sigla portugés), Cristovão dos Reis, informa FDCH laiha fundu sufisiente atu fó subsídiu ba estudante finalista sira iha tinan ne’e, tanba orsamentu 2023 ba instituisaun hetan de’it aprovasaun millaun $17,8.
“Kada tinan FDCH sempre apoia estudante finalista sira iha rai-laran, liuhosi subsídiu ida atu tulun sira hodi hakerek monografia, teze no halo investigasaun. Maibé, tinan ida ne’e ita labele apoia estudante sira tanba osan limitadu”, diretór-ezekutivu hatete ba Tatoli iha Fatuhada, tersa ne’e.
Dirijente ne’e relembra katak proposta Orsamentu Jerál Estadu (OJE) FDCH nian ba 2023 ne’e ho montante besik millaun $32, inklui millaun $1 ne’ebé prevee atu fó subsídiu ba estudante finalista sira, maibé iha proposta ne’e ko’a hotu no aprova de’it millaun $17,8.
“Nune’e, FDCH labele halo buat ida no deside tinan ida ne’e sei laiha orsamentu atu apoiu estudante finalista sira. Ita espera kuandu governu foun mai bele tau fali osan ba item ida ne’e hodi bele kontinua filafali subsídiu ba ita-nian estudante finalista sira”, nia afirma.
Iha 2023, FDCH kontinua simu proposta 1.500-resin hosi estudante finalista sira, maibé depende fali ba orsamentu sira hosi liña ministeriál sira-nian. “Karik iha item ruma maka labele ezekuta maka DFCH sei halo análize para bele uza hodi apoia fali ba estudante sira. Maibé, pedidu estudante finalista sira-nian submete hosi Ministériu Ensinu Superiór molok hetan apoia finanseira”.
Ba ida ne’e, FDCH sei halo fali verifikasaun no analiza hodi haree proposta sira ne’e tuir duni kritériu ka la’e, tanba dezde ezisténsia FDCH iha 2011, estudante barak mak hetan ona subsídiu.
Rekorde katak, iha 2021, FDCH simu proposta hosi estudante iha rai-laran no li’ur hamutuk rihun 10-resin ne’ebé haruka hosi Ministériu Ensinu Superiór Siénsia no Kultura, maibé depois proposta sira ne’e verifika hotu maka hela de’it 3.025.
“Signifika hosi dadus 3.025 ne’ebé pasa ne’e, iha estudante finalista hamutuk 1.975 maka la passa, tanba sira-nian dokumentu dobru inklui dokumentu balun laiha aneksu. Ho nune’e, orsamentu ne’ebé maka FDCH prevee hamutuk rihun $100 no aloka de’it ba estudante ne’ebé pasa iha verifikasaun dokumentu ne’e”, Cristovão dos Reis realsa.
Apoia finanseira ba estudante finalista sira, liuliu lisensiatura hetan $500, mestradu $650 no doutoramentu rihun $1 no ba estudante sira iha rai-li’ur depende ba kustu vida kada nasaun.
Jornalista: Tomé Amado
Editora: Maria Auxiliadora
