iklan

OPINIAUN

Kampaña eleitorál: “Liberta povu” hanesan “lipstik” pinta ba ibun

Kampaña eleitorál: “Liberta povu” hanesan “lipstik” pinta ba ibun

Memensio Sequeira Freitas.

Hosi: Memensio Sequeira Freitas

Tuir kalendáriu  Eleisaun Parlamentár tinan 2023 ne’ebé publika iha Jornál Repúblika loron 16 fulan-Fevereiru tinan 2023, períodu kampaña eleitorál sei hahu iha loron 19 fulan-Abril to’o loron 18 fulan-Maiu tinan 2023. Signifika, durante períodu loron 30 nia laran, partidu polítiku hamutuk 17 ne’ebé hetan ona validasaun hosi Tribunál Rekursu sei tuun ba fatin hotu-hotu atu hato’o sira-nia kumpromisu eleitrorál ba povu eleitoradu sira, bazeia ba kalendáriu kampaña nian ne’ebé aprova hosi Komisaun Nasionál Eleitorál (CNE).

Tuir konseitu balun hosi matenek-na’in sira kona-ba eleisaun nian, kampaña eleitorál katak atividade polítika hosi partidu polítiku sira-ne’ebé kompete iha eleisaun atu konvense eleitoradu sira liuhosi fa’an ka oferese sira-nia vizaun, misaun, programa no imajen hosi partidu ida-idak nian, nune’e povu eleitoradu sira bele hili iha loron votasaun nian. Tanba ne’e mak iha ona entidade barak inklui Igreja Katólika liuhosi Conferência Episcopal Timorense husu ba partidu polítiku sira atu hatuur no aprezenta mak programa ba dezenvolvimentu, envezde insulta ka atake malu ho istória rebo-rebo ne’ebé la fó benefisia povu eleitoradu.

Kampaña eleitorál ne’ebé di’ak tuir hanoin balu hosi péritu sira mak presiza mentein no mellora moralidade, valór no prinsípiu relijiaun no identidade nasionál; hasa’e konxiénsia povu nian atu kumpre Lei fó informasaun ne’ebé loos no moos, iha balansu no ho responsabilidade nu’udar parte integradu hosi edukasaun polítika; kria komunikasaun polítika ida di’ak no saudavél entre partidu polítiku no ho komunidade nu’udar parte importante hosi harii kultura polítika ida demokrátiku, saudavel no dignu; respeita diverjénsia iha aspetu hotu-hotu umanidade nian inklui respeita ema-nia privasidade nu’udar prova konkretu respeitu mútua iha sosiedade ida-nia laran.

Purtantu, kampaña eleitorál la’ós momentu atu ema insulta malu, ko’alia lia-aat ba malu, hasa’e ka hatuun malu, sadik malu ka ke’e malu to’o lekar sai ema ida-nia privasidade iha públiku. Kampaña eleitorál ne’ebé di’ak mak kampaña ida hato’o ninia programa no planu dezenvolvimentu ba nasaun no ba povu, nune’e, bele hadau ka manán eleitoradu sira-nia laran hodi fó votu ba sira iha tempu eleisaun nian.

“Povu” nia naran hanesan “Lipstik” pinta ba ibun 

Normalmente, iha atividade kampaña polítika iha Timor-Leste, polítiku sira liuhosi sira ida-idak nia partidu sempre temi ho liafuan rebo-rebo kona ba povu. Povu nia naran sai boot no ai matéria prinsipál iha sira-nia kampaña. Promesa sira atu lori povu hosi situasaun ida ba situasaun seluk, kompromisu sira atu muda no hadi’a povu nia moris, povu tenke ida-ne’e ka ida-ne’ebá no liafuan rebo-rebo no funan-funana renda-renda sei sai hosi polítiku sira-nia ibun durante kampaña nia laran.

Buat balun ne’ebé ita haree durante kampaña eleitorál, polítiku sira ba tanis iha povu nia oin, ita lahatene tanis tanba povu nia susar ka tanba atu hetan votu hosi povu ka tanis ba povu nia votu? Dala balun, polítiku sira tuun ba halo kampaña, lori mós ho sasán nesesidade bázika (hahan) ka osan ruma hodi ba kari netik ba povu nia matan, hanesan manu nia na’in sira kari batar musan ba manu sira atu tuku. Lahatene, asaun sira-ne’e hanaran solidariedade ka tanba hakarak hetan simpatia ka hakarak atu nauk povu nia lian?

Dala barak mós polítiku sira ba hako’ak no rei povu iha tempu kampaña, hodi hatudu sira-nia domin ba povu maibé bainhira kaer tiha ukun, eh, sira haluha tiha povu no hakuak mak sira-nia maluk atu tuur iha fatin di’ak. Lahatene, ida-ne’e tanba hadomi povu ka tanba atu atrai de’it povu nia simpatia atu vota ba sira? Iróniku liu mak polítiku sira ba kesar malu iha povu nia oin, ami mak halo ida-ne’e no sira la halo ida-ne’ebá! Halo povu mós konfuzaun fali ho ezisténsia partidu sira-nian. Partidu sira gosta ba sura saida mak sira halo ona ho Povu ho Estadu nia rekursu hodi sura fali ba povu. Haluha tiha katak povu merese hetan saida mak sira tenke hetan, tanba lejitimidade be partidu sira hetan atu uza povu nia rekursu ba hadi’a povu nia moris ne’e, sira hetan duni hosi povu liu hosi eleisaun.

Povu sai tiha instrumentu ba polítiku sira iha tempu kampaña atu polítiku sira uza hanesan sira nia alvu hodi bele hetan lejitimidade ba asume kargu sira Estadu nian. Alias, iha tempu kampaña eleitorál, povu sai matéria di’ak ba polítiku sira atu hafurak sira nia ibun, hanesan loloos inan feton sira hafurak sira-nia ibun ho lipstik ka batom bainhira sai hosi uma, maibé bainhira hetan ona buat di’ak ruma iha li’ur no fila ba uma, sira sei hamoos lipstik refere to’o ninia lalatak de’it mós ita la haree kois ona.

Fenómenu hafurak povu nia naran iha polítiku sira-nia ibun iha kampaña eleitorál, sempre akontese durante eleisaun iha dékada rua ne’e nia laran. Realidade hatudu, hafoin eleisaun liu tiha no polítiku sira hetan ona saida mak sira hakarak, povu nia naran la mosu ona iha sira-nia ibun, satán iha sira-nia hanoin! Buat ne’ebé mosu iha sira-nia ibun no hanoin mak priviléjiu, prestíjiu pesoál no konserteza interese partikulár sira-nian la’ós ba povu nia interrese.

Fenómenu sira hanesan ne’e mak ita koñese ho propaganda polítika. Propaganda polítika ne’e hanesan de’it maneira ida hosi polítiku sira atu garante sira-nia votu hodi ba kaer ukun. Gomes (2012) deskreve katak propaganda política são todas as formas de realização de meios publicitários que têm por objetivo conquistar simpatizantes ao conjunto de ideias de um partido e garantir votos.

Purtantu, propaganda polítika hirak ne’e sai de’ít hanesan publisidade ida hosi polítiku sira. Buat ne’ebé importante liu iha propaganda polítika mak garante lai votu atu partidu bele konkista vitória. Kestaun atu realiza ka realiza, hala’o ka la hala’o, ne’e urusan belakang! Importante há’u-nia partidu manán no hetan lejitimidade, tinan lima oin mai mak há’u ba promete tan.  Janji tinggal janji…

Liberta povu no partidu polítika nia responsabilidade 

Hori uluk kedas, bainhira patriota sira hanoin atu harii repúblika ida be ita moris ba ne’e, sira hanoin kedas ona kona-ba libertasaun povu. Hanoin sira-ne’e mosu tanba durante sékulu haat (4) ho balun, povu maubere ain-tanan ida-ne’e moris nu’udar povu oprimidu, moris nu’udar atan no moris iha situasaun marjinalizadu. Povu barak serbisu nu’udar asuleár no ordenás hodi ba halo serbisu ba ema seluk, katak sira be iha klase sosiál boot liu iha sosiedade ida-nia leet. Povu ne’ebé iha altura sira-ne’ebá ema tau ba kotuk, hafutar sira ho situasaun mukit, kiak, beik no ignoránsia.

Tanba realidade hirak ne’e duni mak saudozu boot Nicolao Lobato hamutuk ho ninia kamarada sira, liuhosi saudozu Francisco Xavier do Amaral proklama República Democrática de Timor-Leste ida-ne’e iha loron 28 fulan Novembru tinan 1975. Soké, tanba diferensa ideia ne’ebé lideransa sira altura ne’ebá labele jere ho didi’ak mak hamosu tiha fali invazaun ida hosi Indonézia, no durante tinan 24 nia laran, ita tenke lakon tempu no lakon ema didi’ak kuaze rihun atus tolu atu liberta uluk ita nia pátria.

Tinan 20-resin ona mak ita moris iha pátria libertada no moris daudaun hela iha luta ba libertasaun povu nian. Ita halo eleisaun dala-lima ona (sura ho Eleisaun Antisipada), ita iha ona lejislatura dalimak (5) no iha governasaun ualu. Ita iha ona fundu soberanu ida ho naran fundu petrolíferu no ita gasta ona billaun ba billaun. Rezultadu hosi gastus no eleisaun hirak ne’e, povu nia moris mak nafatin. Tenke rekoñese katak povu la’ós ona atan hodi serbisu ba ema seluk hanesan tempu uluk, povu maioria la beik ona maibé tenke rekoñese nafatin mós katak povu maioria sei moris iha mukit no kiak nia laran. Povu barak sei moris iha marjinalizadu nia kbiit no susar tebe-tebes ba sira atu liberta sira nia-aan. Saida mak sala?

Libertasaun povu la signifika Estadu ka partidu polítiku sira tenke fahe osan ba sira, ka líder sira tenke hako’ak sira ho tanis ka líder sira tenke fahe sesta solidriedade ba sira. Libertasaun povu katak Estadu liuhosi partidu polítika sira be hetan lejitimidade hosi povu iha eleisaun, tenke kria kondisaun, hamosu polítika sira pro-povu no iha boa vontade atu kontinua serbisu ho umildade no ho vizaun tuir planu estratéjiku dezenvolvimentu ne’ebé iha. Ho kondisaun hirak ne’e, fasilita povu atu povu rasik liberta sira-nia aan liuhosi meius ne’ebé iha.

Iha ninia diskursu eróika iha London’s Trafalgar Square, Nelson Mandela hateten katak “iha sékulu foun ida-ne’e, ema juta ba juta iha nasaun ki’ak sira iha mundu kontinua moris iha situasaun prijoneiradu, moris iha situasaun eskravidaun no moris ho kesi metin hela iha prizaun ki’ak nian. Agora mak tempu atu liberta sira. Hanesan mós ho kravidaun no apartheid, ki’ak  la’ós kestaun naturál.

Pobreza nu’udar produtu hosi polítika ema-nian, bele rezolve no bele halakon liuhosi asaun no polítika koletiva ema-nian. Asaun atu halakon ki’ak la’ós movimentu solidariedade ida. Asuntu halakon ki’ak ida-ne’e kestaun justisa ida, asaun ida-ne’e nu’udar protesaun ba direitu ema-nian ne’ebé fundamentál tebes, direitu atu moris ho dignu no moris ida ne’ebé serve nu’udar povu libertada” (Nelson Mandela, 2005).

Eleisaun tinan ida-ne’e nu’udar eleisaun ida desizivu no determinante. Povu kole ona atu hein de’it libertasaun ida-ne’e durante tinan 450 nia laran, aumenta tan ho 24 durante okupasaun Indonezia. Povu lakon ona nia sasán barak, nia riku soin barak inklui lakon nia família barak, mesak ema didi’ak de’it. To’o duni ona tempu atu povu goza ninia libertasaun ida-ne’e liuhosi polítika no vontade di’ak polítiku sira-nian bainhira ba kaer ukun hosi lejitimidade ne’ebé povu fó iha eleisaun.

Ita tenke muda ona situasaun ida-ne’e. Situasaun ida iha ne’ebé Nasaun no Povu moris fali iha vingansa polítika ida-nia laran, situasaun ida-ne’ebé polítiku sira lakon fali tempu atu hasa’e no hatuun malu hodi ignora tiha povu nia direitu ba moris di’ak no dignu, tuir patriota sira-nia mehi. Ita presiza mak polítika ida saudável, iha ne’ebé partidu sira konsentra ideia koletiva ida tuir matan-dalan ba dezenvolvimentu ne’ebé iha, atu aselera prosesu dezenvolmentu ita-nia rain nian, nune’e povu bele sente impaktu pozitivu sira iha vida sosiál no ekonomia. Ho nune’e de’it, mak polítiku sira bele dada besik povu ba libertasaun ida loloos. Dala ida tan, atu liberta povu, polítika sira la presiza fahe osan ka halo sesta solidariedade. Polítiku sira presiza de’it kria kondisaun di’ak atu povu bele aproveita kondisaun hirak ne’e ba liberta sira-nia aan hosi mukit.

Tempu duni ona mós atu povu kore sira-nia aan hosi fanatizmu ba figura líder ida nian ka ipnotizadu ho istória partidu sira-nian. Tempu ona, atu povu halo komparasaun ho didi’ak ba partidu polítiku sira be kaer ona ukun durante dékada rua ne’e nia laran. Povu tenke hatene partidu ida-ne’ebé mak koloka sira nu’udar sentru ba dezenvolvimentu no partidu ne’ebé mak hafurak de’it povu nia naran iha sira-nia ibun maibé la fó impaktu pozitiva ruma durante sira-nia ukun.

Povu tenke hatene separa ona partidu polítika sira hosi slogan mamuk sira ho partidu ne’ebé realiza duni sira-nia promesa durante kampaña eleitorál. Povu nia matan tenke nakloke ona atu haree rezultadu hosi ukun sira durante ne’e. Katak, partidu ne’ebé mak konsege duni dada sira besik liu ba libertasaun entre partidu ne’ebé dada besik liu libertasaun ba ninia kuadru no grupu sira durante kaer ukun. Desizaun povu nian iha eleisaun tinan ida-ne’e determinante atu deside distinu povu no nasaun nia vida ba tinan lima oin mai. Tanba ne’e, kampaña eleitorál ida-ne’e tempu duni atu partidu sira faan sira-nia programa no tempu mós ba povu atu tetu ho kuidadu hodi la fó votu sala ba partidu sira.

Espera katak, Prezidente Repúblika (José Ramos Horta) bele garante kondisaun sira atu la mosu tenik vingansa polítika iha ita-nia rain pós Eleisaun Parlamentár ida-ne’e. Bainhira eleisaun liu tiha no Tribunál Rekusu valida no anunsia ona rezultadu eleisaun nian, Prezidente Repúblika mak sei  foti no fó pose ba Primeiru Ministru ne’ebé partidu eh aliansa partidu sira ho maioria parlamentár sei foti, bainhira rona partidu polítiku sira-ne’ebé iha Parlamentu Nasionál (alineia d hosi artigu 85 KRDTL).

Ne’eduni, ita hotu hein katak Prezidente Repúblika sei la foti desizaun ho sujetividade, maibé foti desizaun tuir buat ne’ebé Lei hateten. Prezidente Repúblika tenke halo tuir definisaun ne’ebé Konstituisaun Repúblika atribui ba nia, katak Prezidente Repúblika mak Xefe Estadu, símbólu ba garantia independénsia nasionál no unidade Estadu nian, no instituisaun demokrátika sira-nia funsionamentu regulár (alineia 1 hosi artigu 74 KRDTL). (*)

iklan
iklan

Leave a Reply

iklan
error: Content is protected !!