DILI, 18 abríl 2023 (TATOLI)—Ministru Administrasaun Estatál (MAE), Miguel Pereira de Carvalho, hateten konsttrusaun Uma Naroman ba Povu (UNP) ba tinan 2023 ne’e sei hahú iha maiu tinan 2023.
“Ba tinan ne’e, ita foin mak finaliza identifikasaun ba benefisiáriu sira no iha fulan-maiu nia laran bele halo konstrusaun uma naroman ba povu, ba benefisiáriu sira iha territóriu nasionál,” Governante ne’e hateten ba Agência Tatoli, hafoin partisipa serimonia entrega tinta indelevel hosi UNDP ba STAE, iha salaun STAE Caicoli, tersa ne’e.
Ba tinan ida-ne’e, nia dehan, Governu prevee millaun $61 hodi kontinua implementa programa Uma Naroman ba Povu (UNP) no UNP+ B iha territóriu nasionál.
Governu kontinua ba programa UNP ho UNP+ B ba tinan 2023 mak UNP sei konstrui uma kuaze 3.451 no UNP+ B fahe zinku hamtuuk 4.107 ho nia orsamentu ne’ebé Governu aloka liuhosi PNDS hamutuk $61.721.500,08.
Governante ne’e hateten, implementasaun UNP tinan 2021 nian, ekipa Programa Nasionál Dezenvolvimentu Suku (PNDS) ne’e atinje ona 98%.
“UNP 2021 nian, nia progresu atinje 98% no hela 2% mak seidauk tanba dalan, nune’e seidauk konklui,” nia dehan.
Mezmu dalan sai dezafiu maibé Governu esforsu nafatin hodi kontinua halo no sei finaliza nia konstrusaun fíziku ne’e.
“Ita la’ós la halo, ita kontinua halo no sei konklui iha tinan ne’e. Maibé iha uma balun nia fíziku foin mak 40% no iha balun ne’ebé 50%,” nia hateten.
Entretantu UNP 2022 foin mak atinje 80% no hela 20% mak seidauk maibé ida-ne’e mós ekipa kontinua halo hela.
Ministru informa, durante mandatu VIII Governu Konstitusionál nian ne’e harii ona UNP iha territóriu nasionál hamutuk 9.854 no hosi totál UNP ne’ebé iha tinan 2021 uma hamutuk 1.254, iha 2022 ne’e iha uma 5.000 no iha 2023 hamutuk 3.600.
Jornalista : Osória Marques
Editór : Cancio Ximenes
