DILI, 18 abríl 2023 (TATOLI)–Ministru Turizmu Komérsiu no Indústria, José Lucas do Carmo da Silva, relata preparasaun asiste fenómena solár eklipse ba Primeiru-Ministru (PM), Taur Matan Ruak.
“Mai atualiza programa solár eklipse ne’ebé sei akontese iha ita-nia rain, afetadu liu mak iha Ponta Leste hanesan Lautém, Viqueque, no parsialmente sei kona Baucau. Iha preparasaun ida ne’e Ministériu Turizmu mak koordena liña ministériu hotu atu fasilita prosesu ne’e hanesan fasilita bainaka estranjeiru sira. Tanba ne’e mak aloka fundu hamutuk $250.000 hodi haree ba preparasaun,” Ministru Turizmu hateten hafoin hasoru Xefe Governu, iha Palásiu Governu, tersa ne’e.
Notísia relevante : MTKI sosializa fenómenu eklipse solar híbridu ba komunidade Viqueque
Preparasaun ne’ebé Governu liuhosi Ministériu Turizmu Komérsiu no Indústria (MTKI) hala’o ona maka halo sosializasaun ba solár eklipse ne’e rasik iha Viqueque no Lautém. Halo ona abertura feira iha Baucau, Lautém (Com), no Viqueque.
“Ajenda ba preparasaun hahú ona horiseik (segunda), ne’ebé hahú ona feira no preparasaun seluk hodi simu bainaka sira. Alende ne’e preparasaun iha Baucau mós iha, signifika katak siéntista hosi nasaun seluk mai labele liu bá Lautém maibé sira bele hela iha Baucau hodi asiste,” nia tenik.
Feira sira ne’e iha atividade balun akontese hanesan festivál ai-han lokál, pintura, iha Com realiza kompetisaun korida ró. Enkuantu iha loron 20 abríl mak iha ajenda prinsipál katak hotu-hotu hamutuk iha fatin ne’ebé preparadu hodi asiste hamutuk.
Jornalista : Antónia Gusmão
Editora : Julia Chatarina
